Ол түмүгэр хотон иһигэр турбут 137 сүөһү уокка былдьанна. Бу хотон 1975 сыллаахха тутуллан үлэҕэ киирбит эбит. Сарсыарда 5 чааһы ааһыыта оскуола харабылыгар телефонунан эрийбиттэр. Харабыл тахсан көрбүтэ — хотон аҥаара номнуо олоччу умайан сууллубут. Ол кэннэ тыллыы сүүрбүт. Бу быһылаан кэнниттэн ТХПК дириэктэрэ, эдэр салайааччы Николай Васильев уонна кини 27 үлэһитэ уустук балаһыанньаҕа киирдилэр. Көрөр сүөһүлэрэ, үлэлиир хотонноро суох хааллылар.

То5о?

Хамыыһыйа сабаҕалааһынынан, электричество боруобатыттан уот барбыт буолуон сөп. Сүөһүлэр барахсаттары киһи аһынар, биир үксүн буруоҕа тумнастан өлбүт буолуохтарын сөп. Өссө да чуолкай быһаарыы тахса илик. Тыа хаһаайыстыбатын министиэристибэтин уонна улуус дьаһалтатын бэрэстэбиитэллэрэ кэлэн балаһыанньаны көрдүлэр. Ол түмүгэр маннык быһаарыы ылылынна: умайбыт аттыгар турбут 80 миэстэлээх эргэ хотону сөргүтэр буоллулар. Улуус уонна нэһилиэк күүһүнэн хотон өрөмүөннэниэҕэ. Оттон тыа хаһаайыстыбатын министиэристибэтэ сүөһүнү атыылаһыыга көмө оҥоруон туһунан биллэрдэ.

Бүгүҥҥү күннээх туругунан хотону субуотунньук көмөтүнэн номнуо өрөмүөннээн бүтэрдилэр. Тыа хаһаайыстыбатын уонна ас-үөл политикатын министрэ Иван Слепцов республика үрдүнэн бу быһылааҥҥа көмө акциятын ыытар наадатын биллэрдэ. Онон бу акцияҕа республика дьонун-сэргэтин көхтөөхтүк кыттарга ыҥырда.