«Боотурдар оонньуулара» Х-с Москватааҕы турнира ааспыт субуотаҕа, сэтинньи 23 күнүгэр дойдубут киин куоратын биир бастыҥ спортивнай саалатыгар – Иван Ярыгин аатынан тустуу Дыбарыаһыгар ыытылынна. Боотурдары РФ спордун үтүөлээх маастара, көҥүл тустууга Россия үс төгүллээх чемпиона, аан дойду икки төгүллээх чемпиона Виктор Лебедев өйүү кэллэ.

Манна кыттарга сайаапкалары Владивосток, Хабаровскай, Новосибирскай, Иркутскай, Красноярскай, Томскай, Екатеринбург, Санкт-Петербург, Дьокуускай уонна Москва хамаандалара биэрбиттэр.

Бу бырааһынньыкка студент ыччаты эҕэрдэлии бочуоттаах ыалдьаттар кэлбиттэр, олор истэригэр РФ СФ Федерациятын Сэбиэтин чилиэнэ, Бүтүн Россиятааҕы уонна Аан дойдутааҕы мас тардыһыытын федерациятын президенэ, «Москваҕа Саха сирин биир дойдулаахтарын түмсүүтүн» салайааччыта А. Акимов, СР идэҕэ үөрэтии миниистирин бастакы солбуйааччы С.Москвитин, ГБУ РС (Я) «Манчаары аатынан Республикатааҕы национальнай спорт көрүҥнэрин киинин» директора, Ил Түмэн депутата И.Григорьев, СР Үрдүкү маастарыстыбатын Оскуолатын тренерэ, СР үтүөлээх тренерэ А.Сафронов, уонна Лесгафт аатынан физическэй культураҕа, спорка Санкт-Петербургтааҕы Национальнай государственнай университетын преподавателэ Г.Троев бааллар.

Күрэхтэһиилэр сэттэ көрүҥүнэн ыытылыннылар: саха ыстаҥаларыгар (кылыы, ыстаҥа, куобах), тутум-эргииргэ, балык былдьаһыытыгар, мас тардыһыытыгар, хапсаҕайга ,хамаанданан тустуу – хомуурга уонна быаны тардыһыыга. Күрэхтэһии түмүгэ маннык буолла: 1 миэстэ — Новосибирскай; 2 — Дьокуускай; 3 — Красноярскай-1; 4 — Москва-1; 5 — Красноярскай-2.

Спорт көрүҥнэринэн бастаабыттар Александр Акимовтан анал бириистэри туттулар. Саха кылыытыгар бастыҥынан Иннокентий Говоров (Москва-2), тутум-эргииргэ – Айаал Петров (Красноярскай-1), мас тардыһыытыгар – Владимир Никитин (Дьокуускай), хапсаҕайга – Матвей Лыткин (Екатеринбург), балык былдьаһыытыгар– Алексей Захаров (Дьокуускай) буоллулар. Кыайыыга дьулуурун иһин Павел Верховцев (Хабаровскай), турниры ыытыыга көмөтүн иһин– Надежда Новоприезжая (Москва) наҕараадаланнылар. Көрөөччүлэр биһирэбиллэрин Афанасий Старостин (Москва-1) ылла.

Саха сирин бүгүҥҥү күнүгэр саамай биллиилээх тустууга Виктор Лебедев уонна Михаил Эверстов бастыҥ хамаандаҕа уонна саамай көхтөөх көрөөччүгэр икки биэстии тыһыынчалаах бирииһи туруордулар. Иккис бирииһи Москва студентката Татьяна Оболкина ылан үөрдэ-көттө.