Учуонай-фольклорист, литературовед, филологическай наука кандидата, Россия Суруйааччыларын сойууһун чилиэнэ Сардаана Платоновна өр кэмҥэ Гуминитарнай чинчийии институтугар үлэлээбитэ.

Сардаана Платоновна бастаан фольклор салаатыгар саха норуотун уус-уран айымньыларын дириҥник үөрэтэн, ырытан, тылбаастаан хас да кинигэни, хомуурунньугубэлэмнээһиҥҥэ сыламтата суох үлэлээбитэ. Ол курдук «Саха таабырыннара» (1975), «Саха норуотун ырыалара-тойуктара» (1982), «Саха остуоруйалара» диэн икки тылынан (1976, 1977, 1980) тахсыбыт хомуурунньуктар бэчээттэниилэригэр быһаччы кыттыыны ылбыта. 1986 сыллаахха Алма-Ата куоракка биллиилээх фольклорист Б.Н.Путилов салалтатынан «Саха норуотун таабырыннара» диэн темаҕа кандидатскай диссертациятын бэрт ситиһиилээхтик көмүскээбитэ.

С.П. Ойуунускайа төрөөбүтэ 80 сылыгар аналлаах ахтыы-киэһэни ГЧИ уонна П.А. Ойуунускай аатынан Литературнай музей көҕүлээн ыыттылар. Ахтыы киэһэтин С.П. Ойуунускайа олоҕун уонна айар үлэтин туһунан доҕоро, коллегата филологическай наука доктора, литературовед Д.Е. Васильева сиһилии сырдатта. Быраата Н.Н. Павлов, кыыһа, университет преподавателэМ.С. Соловьева, сиэн балтылара биологическай наука кандидата Н.П. Соловьева, А.И. Николаева, тастыҥ балта, Нам улууһун Хатырык нэһилиэгин дьаһалтатын сүрүннүүр специалиһа, М.Н. Заровняеваахтыы оҥордулар.

Саха сирин Суруйааччыларын союһуттан саха народнай суруйааччыта С.А.Попов-Сэмэн Тумат, Н.Е. Винокуров-Урсун, Е.В. Слепцова-Куорсуннаах, ону таһынан коллегалара филологическай наука доктордара, академик П. А. Слепцов,А.Н. Мыреева, В.В. Илларионов, филологическай наука кандидаттара фольклорист С.Д. Мухоплева, К.Д. Дьячковскай, Л.Д. Нестерова, коллегата Ю.И. Попов ахтан-санаан ыллылар.

С. П. Ойуунускайа бииргэ студеннаабыт дьүөгэтэ Е.П. Третьякова, оҕо сааһын доҕоро Н.Д. Дьячковская, чугас дьүөгэтэ Т. В. Копырина истиҥ-иһирэх ахтыыларын оҥордулар.

Ахтыылар быыстарыгар Гуминитарнай чинчийии институтун эдэр научнай үлэһиттэрэ В.Д. Посельская, С.Е.Ноева С.П. Ойуунускайа хоһооннорун ааҕан тэрээһин ыалдьыттарын биһирэбиллэрин ыллылар.

Түмүк тылы П.А. Ойуунускай аатынан Литературнай музей директорын солбуйааччы Л.Н. Васильева уонна киэһэни иилээн-саҕалаан ыыппыт филологическай наука доктора Л.Н. Романова эттилэр.