Таатта улууһун айылҕата ураты кэрэ, эмтээх отунан баай, дьэҥкир ууларынан угуйар, минньигэс балыктаах, ыраас салгыннаах дойду. Манна туризмы төһө баҕарар күүскэ сайыннарар кыахтаахтар эрээри, суол суоҕа предпринимателлэр үлэлэрин атахтыыр.

СИА корреспонденыгар «Предпринимателлэри өйүүр киин” салайааччыта Марианна Мосоркина санаатын үллэһиннэ:

- Онон кыратык атарахсытыллабыт да диэххэ сөп. Биһиги улуус Россия бөдөҥ куораттарыттан, тас дойдуттан туристары угуйарга, ыҥырарга, онон туризмы сайыннарарга күүскэ үлэлэһэр баҕалаахпыт. Онуоха тупсаҕай тутуулаах, толору хааччыллыылаах гостиницалар наадалар. Туох кистэлэ кэлиэй, аныгы үйэ ирдэбилигэр эппиэттиир гостиницабыт суох буолан, ыраахтан кэлбит ыалдьыттар улууспутун ааһа бараллар. Оттон дьиҥэр, биһиги болҕомтону тардар ураты кэрэхсэнэр сирбит элбэх. Онон сыал-сорук туруоруннубут. Чөркөөх бөһүөлэгэр киин гостиницаны тутан, туристическай базаларбытын тупсаран, турист ханна барыан баҕарарын талан ыларын курдук каарта оҥорон, сынньана кэлбит киһини баҕарбыт сиригэр тиэрдиэхтээхпит. Тааттабыт улууһун туһунан социальнай ситимҥэ киэҥник кэпсээн, тыытыллыбатах уратылаах айылҕатынан күүскэ угуйан ыраахтан ыалдьыттары тардыахпыт. Мантан инньэ үлэни күүһүрдэр туһуттан улууспутугар туризмынан дьарыктанааччылар бэйэ-бэйэлэрин кытта ыкса ситимнээх үлэлиэхтэрэ.

Мегаполис баһылаабыт үйэтигэр, ама, ким ийэ айылҕаҕа ис дууһатыттан дуоһуйа сынньаныан, ып-ыраас салгынынан астына тыыныан, күөх хонууга, ыраас хаарга күөлэһийиэн, балыктыан, сир астыан, сыыртан сырыылыан баҕарбат буолуой?! Итинник этэн туран, “төгүрүк остуол” кыттыылаахтара санаалара улаханнык көтөҕүллэн, үлэлэрин өссө тупсарар, сайыннарар түбүгэр түстүлэр. Маннык далааһыннаах үлэҕэ салалта өйөбүлэ күүтүллэр.