Сокуон ирдэбилинэн, сабыылаах суут мунньаҕар туора киһи ким да сылдьыбат эрээри, атын көннөрү истээччилэр (аймахтар, доҕоттор, юрист-студеннар) бары олорон хаалбыттарын туһунан эмиэ эппитим. Итинэн сибээстээн биһиги, биэс суруналыыс («Саха сирэ», «Наше время», «Якутск вечерний» хаһыаттар, «Сахалайф.ру», «Сахапресс.ру» интернет-таһаарыылар) Дьокуускай куорат федеральнай суутун бэрэссэдээтэлин эбээһинэһин толорооччутун аатыгар сайабылыанньа суруйдубут диэбитим. Дьоҥҥо-сэргэҕэ дьиҥ-чахчыны иһитиннэрэр-биллэрэр, тиэрдэр бырааппытын сөргүтүҥ диэн ис хоһоонноох.

Соторутааҕыта Дьокуускай куорат федеральнай суутун бэрэссэдээтэлин эбээһинэһин толорооччу Н.В.Ивановаттан ол сайабылыанньабытыгар маннык эппиэти туттубут:

«РФ Холуобунай-процессуальнай кодексатын 6.1. ыстатыйатын 5-с пуунун ирдэбилинэн, холуобунай дьыала суут көрүүтүгэр киирэн баран, өр бириэмэҕэ көрүллүбэт эбэтэр уһуур-тэнийэр, тардыллар түбэлтэтигэр, интэриэстээх дьон суут бэрэссэдээтэлигэр сайабылыанньа суруйар бырааптаах. Дьыаланы көрүүнү түргэтэтиҥ диэн.

Оннук түбэлтэҕэ суут бэрэссэдээтэлэ сокуоҥҥа олоҕуран, дьыаланы көрүү чопчу болдьоҕун ыйан биэрэр уураах таһаарар уонна (эбэтэр) дьыаланы көрүүнү түргэтэтэргэ туһуламмыт процессуальнай дьайыылары оҥорор. Ол эбэтэр, суут бэрэссэдээтэлэ дьыаланы көрүүнү түргэтэтэргэ сыһыаннаах боппуруостары көрөр.

Бу дьыл ахсынньы 3 күнүгэр судьуйа Говорова Л.И. сууттанааччы В.Иванов дьыалатын көрүүгэ суруналыыстар сылдьыыларын суут силиэстийэтэ бүтүөр диэри хаарчахтыыр туһунан уураах таһаарбыт. «Российскай Федерацияҕа судьуйалар статустарын туһунан» сокуон 1 ыст. 4-с пуунунан, сууттар тутулуга суохтар, РФ Конституциятыгар уонна сокуоҥҥа эрэ бас бэринэллэр. Дьыаланы көрөн, бириигэбэр таһаарыыга кимиэхэ да отчуоттаабаттар.

Итинэн сибээстээн, дьыала көрүллэ сылдьар кэмигэр ким да орооһор бырааба суох».

Быһата, суут силиэстийэтэ түмүктэнэн, бириигэбэр ааҕыллар күнүгэр диэри суруналыыстар сылдьыбаппыт. «Сахалайф.ру» иһитиннэрбитинэн, судьуйа Лена Говорова ахсынньы 9 күнүгэр таһаарбыт уурааҕынан, эмсэҕэлээччи уонна сууттанааччы ойохторо көрдөрүү биэрэр күннэригэр атын истээччилэр сылдьаллара эмиэ бобуллубут.