Эдэр инбэлииттэр ортолоругар ырыа конкурсун үлэ уонна социальнай сайдыы Министерствота, «Инбэлииттэргэ медико-социальнай уонна идэни ылыыга көмөлөһөр республикатааҕы Лицей-Киин» уонна Бүтүн Россиятааҕы инбэлииттэр обществолара тэрийэн ыыттылар.

Гала-концерка "Биир Ньыгыл Россия" Саха сиринээҕи толорор кэмитиэтин салайааччыта Сахамин Афанасьев сырытта. Кини фестиваль номнуо үһүс төгүлүн ыытыллар, уонна сыл ахсын интэриэһи тардара улаатан иһэр диэтэ.

«Конкурс эдэр инбэлииттэр айар дьоҕурдарын сайыннарыыга, доруобуйаларынан хаарчахтаах дьон обществоҕа көхтөөх буолууларын бөҕөргөтүүгэ ананан ыытыллар. Конкурска 16-тан 30-гар диэри саастаахтар кытыннылар. Биһиги партиябыт доруобуйаларынан хаарчахтаах дьону өйүүргэ аналлаах «Биир дойду — тоҕоостоох эйгэ» бырайыагы олоххо киллэрдэ. Бу бырайыак инбэлиит дьон иннигэр турар социальнай ыарахаттары туоратар сыаллаах дьон ситимин тэрийдэ. Сүрүн соругунан инбэлииттэр сонуннары көнөтүк ылалларыгар көмөлөһөр, көхтөөх общественнай олоххо угуйар, быраап культуратын таһымын үрдэтэргэ аналлаах», - диэтэ Сахамин Афанасьев.

Партия толорор кэмитиэтин «Бастыҥ фольклорнай ырыа» номинацияҕа анал бирииһин «Алаас» фольклорнай ансамбль ылла.