Бу долгутуулаах киэһэҕэ Саха Республикатын культуратын үтүөлээх үлэһитэ, өр сылларга үрдүк таһаарыылаахтык үлэлээбит бочуоттаах ветеринарнай быраас, «Гражданскай килбиэн” знак кавалера “Россия искусствоватын тас дойдуларга тарҕатыыгар үтүөлэрин” иһин Москва куорат «Жизнь городов» диэн норуоттар икки ардыларынааҕы программа кыһыл көмүс мэтээлин хаһаайката Надежда Алексеева айбыт ырыалара ылланнылар. Маны таһынан, кини төрөөбүт дойдутугар тапталын, үлэҕэ олус бэриниилээҕин уонна айбыт ырыалара-тойуктара киһини кэрэ иэйиинэн кууһарын туһунан ахтыылар иһилиннилэр. Бу күн Надежда Алексеева кыыһа СР үтүөлээх учуутала, ССРС уонна РСФСР үөрэҕириитин туйгуна, РФ журналистарын союһун чилиэнэ, республикаҕа киэҥник биллэр методист, учууталлар учууталлара, элбэх кинигэ ааптара Варвара Иванова ордук долгутуулаах ахтыы тылларын эттэ.

Надежда Алексеева ырыаларын «Сайсары» народнай-вокальнай ансаамбыл С.А.Зверев-Кыыл Уолун аатынан Государственнай Үҥкүү ансаамбылын оркестрыгар доҕуһуоллатан толордулар. Санатар буоллахха, кэллэктиип тас дойдуларга ыытыллыбыт араас фестивалларга 10 төгүл кыттан, 6 төгүл Гран-при хаһаайына, 4 төгүл 1-кы степеннээх Дипломунан наҕаарадаланан, кыайыы өрөгөй үөрүүтүн билэн, дьүүллүүр сүбэ, көрөөччүлэр биһирэбиллэрин чахчы ылыан ылбыта. Бу үрдүк чыпчаалы ситиһэргэ Надежда Николаевна үтүөтэ-өнөтө муҥура суох улахан. Билигин ансаамбылы музыкальнай руководителэ Саха Республикатын культуратын туйгуна Светлана Степанова салайан илдьэ сылдьар.

Бу ахтыы кэнсиэргэ ансаамбыл cалайааччыта уонна солисткалара, Надежда Алексеева айар талааныгар сүгүрүйээччилэр норуот эмчитэ Акулина Васильева; үгүс фестиваль кыайыылаахтара Наталья Другина, Клара Ксенофонтова, Галина Мамонтова, Опера уонна балет государственнай театрын артыыската Парасковья Герасимова; «Талба” квартет, “Нюанс” ансаамбыл уонна физико-техническай лицей 6-с кылааһын үөрэнээччитэКүннэй Иванова ураты ырыалары бэлэхтээтилэр.

“Сайсары” народнай ансаамбылы Саха Сиригэр буолбакка Аан дойду таһымыгар таһаарары ситиспит дьоҕурдаах салайааччы Надежда Алексеева сырдык кэриэһигэр анаммыт ахтыы киэһэтэ киниэхэ анаммыт хоһоон ураты тылларынан түмүктэннэ.