Быыстапкаҕа саха быһаҕын оҥорор Сарыал Билюкин  (Таатта), Эдуард Вырдылин (Таатта), Александр Данилов (Хаҥалас), уруһуйдьут, муосчут Роман Петров (Нам) үлэлэрэ хото тардылыннылар. Кинилэрдиин бу быыстапкаҕа саха быһаҕын, хомуһу, сувениры атыылыыр  «Уус экспо» (ИП Надежда Платонова, Дьокуускай) кытынна.

Быыстапкаҕа кэлбит эр дьон саха быһаҕын биһириэхтэрин биһирээтилэр. Тюрк култууратын сэҥээрээччилэрин ураты болҕомтото хомуска хатанна. Биһиги предпринимателлэрбит бородууксуйаларын Казахстаҥҥа аҕалалларын туһунан уонна итиниэхэ майгынныыр этиилэри «Тенгрианство» уопсастыбаннай холбоһук, о.д.а. оҥордулар. Бу тэрилтэ тюрк омук култууратын сөргүтүүгэ ылсан үлэлиир.

«СР предпринимательствоны өйүүр киинэ» «Саха сирин маастардара» экспозицияны тэрийбитин иһин, дипломунан бэлиэтэннэ. Биһиги маастардарбыт оҥоһуктарын коллекциялара «Омук үгэһин илдьэ сылдьыы уонна сайыннарыы» номинацияҕа кыайыылааҕынан ааттанна.

Саха сирэ уонна Казахстан икки ардыларыгар хардарыта сибээс олохсуйарыгар«Our Heritage» (Алматы) уопсастыбаннай фонда өйөбүлүнэн илиинэн уһанар идэлээх дьону кытта көрүстүлэр уонна Казахстан уулуччулаах маастара Сержан Баширов мастер-кылаастарыгар ыҥыран сырытыннардылар .

Киин Азияҕа — бу биир бөдөҥ уонна албан аатырбыт ювелирнай быыстапка буолар. Манна Россияттан, Украинаттан, Беларусияттан, Швейцарияттан, Францияттан, Германияттан, Арменияттан, Бельгияттан, Турцияттан, ХАЭ, Арменияттан уонна Казахстантан барыта 108 компания кыттыбыт. Кинилэр үрүҥ, кыһыл көмүстэн, платинаттан, күндү таастартан оҥоһуктара, чаһыылара, бижутериялара, аһыыр иһиттэрэ, сувенирдара, о.д.а. көрбүтү барыларын санаатыгар хатаммыттара кыратык да саарбахтаммат.