Кини СИА суруналыыһыгар сыл аҥаара хайдах олорбутун туһунан кэпсээтэ: "Ол курдук, мин бииргэ үөрэнэр кыыһым Сардаана Семеновалыын бырайыак суруйаммыт, Норвегия кронунан 30 тыһыынчалаах грант сүүйбүппүт. «Куутокейно» диэн коммунаҕа Саамскай университекка сыл аҥара саам омук тылын, култууратын үөрэттибит. Мин ордук үөрэхтэрин систиэмэтин биһирээтим. Тылы үөрэтэрбитигэр, бу саам омук төрүт тылын илдьэ сылдьааччылары кытта үлэ нөҥүө алтыһан үөрэннибит. Саам омук табаны иитэр. Мин таба тириитин таҥастыырдааҕар буолуох, бэйэтин да көрбөтөх киһи, Норвегияҕа тиийэн имитэн, таҥастаан, оннооҕор таба туйахтарыттан музыкальнай инструмент оҥорбутум. Бу үөрэнэ сылдьан туундараҕа тиийэн табалары наардааһыҥҥа илии-атах буолбутум. Бастаан кэйиэхтэрэ эҥин диэн куттанарым. Кэлин, табалары муостарыттан ыла-ыла наардаан атыыга барары туспа, ыаныллары туспа араартаан, олохтоохторго көмөлөспүппүн астына саныыбын. Мин бу ураты эйгэлээх саам омугу кытта сыл аҥара алтыһан тылга эрэ буолбакка, олоххо үөрэнним. Олох оскуолата киһини үлэнэн иитэр эбит. Биһиги сахалар бэйэбитигэр майгынныыр олохтоох саам норуотун дьылҕата, тыла-өһө миэхэ төрөөбүт тылбын ытыктыырбар, өссө күүскэ таптыырбар төһүү күүс буолла", - диэн сэһэргиир Анастасия.