СӨ Доруобуйа харыстабылын министиэристибэтин штаты таһынан кылаабынай акушер-гинеколога Татьяна Павлова суруналыыстарга иһитиннэрбитинэн, 27 саастаах Нарыйа Платонова билигин туруга үчүгэй.

Нарыйа хара маҥнайгыттан 24-25 нэдиэлэтигэр диэри Дьокуускайга Перинатальнай киин акушер-гинекологтарын кэтэбиллэригэр сылдьыбыта. Эдэр ийэ түөрт оҕону төрөтүөхтээҕэ эрдэ биллибитэ. Саха сирин быраастара хаста даҕаны Томскайга баар биир идэлээхтэрин кытары телеконсиум ыыппыттара.

Перинатальнай киин дириэктэрин солбуйааччы Ольга Колесова оҕо күүтэр дьахтары Томскайга арыаллаабыта.

Ити курдук, кулун тутар 26 күнүгэр Нарыйа Платонова үс кыыска уонна биир уолга күн сирин бэлэхтээтэ. Икки кыыс – 1,1 кг, биир кыыс – 990 гр, уол 900 гр ыйааһыннаахтар. Манна даҕатан эттэххэ, Нарыйа бу маҥнайгы төрөөһүнэ.

- Бэҕэһээ мин Томскайдааҕы Перинатальнай киин кылаабынай бырааһын солбуйааччы Игорь Степановтыын кэпсэтэ сырыттым. Кини ийэ уонна оҕолор доруобуйалара үчүгэйин, бүгүн оҕолору болдьоҕун иннинэ төрөөбүт кырачааннары бүөбэйдиир отделениеҕа көһөрөр былааннаахтарын туһунан үөрэ-көтө кэпсээтэ. Томскайга хаһан да түөрт игирэ биирдэ да төрүү илик эбит. Онон биир идэлээхтэрбит олус соһуйан да, үөрэн да олороллор. Доруобуйа харыстабылын куораттааҕы департаменын дириэктэрэ кэлэн биһиги кыыспытын ис сүрэҕиттэн эҕэрдэлээбит. Биһиги Томскайдааҕы Перинатальнай киин эмчиттэригэр ис сүрэхпититтэн махтанабыт. Инникитин да бииргэ үлэлииргэ эрэллээхпит. 2014 с. Саха сиринээҕи Перинатальнай киин Томскай Перинатальнай киинин кытары бииргэ үлэлииргэ сөбүлэһии түһэрсибитэ. – диэтэ Татьяна Павлова.