Олох уһуна

- Доруобуйа харыстабылын салаатыгар сүрүн ситиһиинэн өрөспүүбүлүкэҕэ демография көрдөрүүтэ салгыы тупсарын уонна олох уһаабытын ааттыыбыт. Олох орто уһуна – 69 сааска тэҥнэстэ (дьахталлар – 75, эр дьон 63-64 сыл). Бу көрдөрүү биһиэхэ улахан суолталаах.

Материальнай-техническэй база

- Биһиги бастакы сүһүөх эмтиир звено материальнай-техническэй базатын бөҕөргөтүөхтээхпит. Тоҕо диэтэххэ, медицинскэй көмө хаачыстыбатын уонна табыгастаах буолуутун үрдэтэр улахан үлэ чуолаан бу звеноҕа ыытыллыахтаах.

Бөдөҥ объектар

- Перинатальнай, онкология уонна кардиология кииннэрэ өрөспүүбүлүкэ Ил Дарханын Ыйааҕар ыйыллыбытынан үлэҕэ киллэриллиэхтэрэ. Саха сирин улуустарыгар 100 фельдшерскэй-акушерскай пууну тутарга өрөспүүбүлүкэтээҕи тосхолго илии баттанна. Барыта 270 фельдшер-акушер пууна баарыттан 190-на эргэрбит дьиэлэргэ үлэлиир.

«Тыа сирин фельдшерэ»

– Нэһилиэнньэҕэ медицинскэй көмөнү 28 тыһыынча эмчит, ол иһигэр 4600 быраас уонна 11 тыһыынча орто сүһүөх персонал, оҥорор.

2014 сылга «Тыа сирин эмчитэ» тосхол өрөспүүбүлүкэ бюджетын суотугар Арктика улуустарын куораттыы тииптээх бөһүөлэктэригэр эмиэ үлэлээтэ. Кэрэхсэбиллээҕэ диэн, Саха сиригэр«Тыа сирин фелдьшерэ» тосхол Россияҕа бастакынан киллэрилиннэ.

Үлэһиттэринэн хааччыллыы

- Министерство кадрдары тус сыаллаах бэлэмнээһиҥҥэ улахан болҕомтотун уурар. 2014 с. кадрдары үөрэтиигэ 20 мөлүйүөн солкуобай бэриллибитэ. Үс өрүттээх сөбүлэһии түһэрсиллэн, студент практикатын сөбүлэһии түһэрсибит улууһун балыыһатыгар барара уонна үөрэҕин бүтэрэригэр онно үлэлиирэ мэктиэлэниэҕэ.

Хамнас

- Быраастар хамнастара ортотунан – 64, орто сүһүөх персонал – 35, алын сүһүөх персонал 21 тыһыынча солкуобайга тэҥнэстэ. (Министр орто хамнаһы ааҕыыга салайар кадрдар хамнастара оруолу оонньооботун тоһоҕолоон бэлиэтээтэ).

Эминэн хааччыллыы

- Кэнники 3 сылга регионнааҕы чэпчэтиинэн туһанааччылары эминэн хааччыйарга өрөспүүбүлүкэ бюджетыттан 1 233,19 мөлүйүөн бэрилиннэ (2010 сылы кытары тэҥнээтэххэ, 2 төгүл элбэх).

Нэһилиэнньэ чэпчэтиинэн туһанар араҥатыгар босхо эмп 5 тосхолунан бэриллэр. Бу тосхоллорго олох уһунун кылгатар эбэтэр инбэлииккэ тириэрдэр сэдэх (орфаннай) ыарыылаах дьону эминэн хааччыйыы киирдэ.