Бириэмийэ «Фтизиатрия» НПК дириэктэрэ Александр Кравченко көҕүлээһининэн 2014 с. Михаил Афанасьевич Тырылгин сырдык кэриэһигэр олохтоммута. Михаил Тырылгин – учуонай, медицинскэй наука доктора, профессор, РФ уонна СӨ наукатын үтүөлээх деятелэ, ССРС доруобуйа харыстабылын туйгуна. Олоҕун улахан аҥаарын анаабыт научнай-практическай киинин дьиэтин эркинигэр Михаил Тырылгиҥҥа анаммыт мемориальнай дуоска былырыын аһыллыбыта.
Уһулуччулаах учуонай аатынан бириэмийэ бастакы лауреатынан Уус-Алдан улууһун сэллиги утары охсуһар диспансер кылаабынай бырааһа, СӨ үтүөлээх бырааһа Иван Петрович Бурнашев буолла. Иван Петрович нэһилиэнньэ ортотугар сэллиги сэрэтиигэ үгүс үлэни ыытар. Кини «Эмтиэхтээҕэр, сэрэтэр ордук» диэн кинигэтэ ааҕааччы киэҥ араҥатыгар ананар.
Маннык бириэмийэнэн быраастар - Саха сиригэр фтизиатрия сулууспатын тэрийиигэ, практическай кыһалҕалары көдьүүстээхтик быһаарыыга, ыарыыны сэрэтии уонна эмтээһин тэрээһин-быраап дьаһалларын өйөөһүҥҥэ, оттон орто сүһүөх медицинскэй үлэһиттэр - киэҥ хабааннаах санитарнай-сырдатар үлэҕэ биллэр кылааттарын иһин наҕараадаланаллар.
СӨ доруобуйа харыстабылын туйгуна, үрдүк категориялаах быраас, «Гражданскай килбиэн» хаһаайката, тыыл бэтэрээнэ, сэллиги эмтиир диспансер фтизиатр-бырааһа Маргарита Александровна Архинчееваны үбүлүөйдээх күнүэнэ биир идэлээхтэрэ истиҥник эҕэрдэлээтилэр.
Комментарии
Авторизация на сайте через социальные сети