И.М. Гоголева-Кындыл поэзиятыгар Ийэ айылҕабыт кэрэтэ, эҥин-эгэлгэ көстүүтэ харахха субу көстөн кэлэр гына хоһуйуллар. Сахабыт сирин хорук тымырынан ааттанар Өлүөнэ өрүспүтүгэр кини элбэх айымньытын анаабыта. Ону иилэ хабан ылан атын поэттар салҕаабыттарын үгүспүт билэр.

Ааспыт үйэ 60-70-с сылларыгар режиссер Ф.Ф.Потапов салайааччылаах Саха драматическай театра кини айымньыларынан 10-ча испэктээкили туруорбута биллэр. Пьеса-остуоруйа, трагикомедия, сатирическай комедия курдук жанрдар алмаас кырыытыныы эҥинэ бэйэлээх дьэрэкээнник күлүмүрдүү оонньообуттара, көрөөччү болҕомтотун киинигэр буола түспүттэрэ. Кындыл драмаларын дьоруойдарын тылларын-өстөрүн байытан, түгэхтээх, эҕэлээх этиилэринэн ситэрэн-хоторон оччотооҕу олох мөкү өрүттэрин саралыы тарпыта.

Кини "Хотугу сибэкки" опереттатын уонна "Наара суох" комедиятын күн бүгүҥҥэ диэри бары да биһирии көрөбүт. Кындыл "Хара кыталыга" кэм-кэрдии бааллаах баалыгар суураллыбакка, сүрэххэ-дууһаҕа сөҥөн, сөҥүөрэн сылдар. Ити курдук кини улугу уһугуннарар, нэһи сэргэхситэр айымньыларын туһунан быысталы билбэккэ сэһэргии, кэпсии туруохха сөп.

И.М. Гоголев-Кындыл төрөөбүтэ 85 сылын Бүлүү улууһа быйыл киэҥник бэлиэтиэҕэ. Аҕыйах хонугунан, тохсунньу 20 күнүгэр, кини үрдүк аатыгар анаммыт үөрүүлээх мунньахха соҕурууттан-хотуттан тыл үөрэхтээхтэрэ, суруйааччылар, суруналыыстар, учуонайдар хото мустуохтара. Бу күн атын араас тэрээһиннэри сэргэ кини олоҕор, айар үлэтигэр анаммыт документальнай киинэни кэрэхсии көрүөхтэрэ, Бүлүүтээҕи норуот театра «Таптал хатыҥа» испэктээкили көрдөрүөҕэ.
Тэрийээччилэр үбүлүөйдээх сыл чэрчитинэн улуус, өрөспүүбүлүкэ таһымнаах тилэри толкуйдаммыт научнай-практическай конференцияны, Гоголев ааҕыыларын, кинигэ быыстапкаларын, лекциялары, викториналары, о.д.а. тэрээһиннэри сыл устата тиһигин быспакка ыытыаҕа.

Бэс ыйыгар Чочу нэһилиэгэр «Хойгуолаах» диэн сиргэ И.М.Гоголевка-Кындылга анаммыт мэҥэ тааһы туруоруохтара.

Бүлүү куоратын кэрэ-мааны сиригэр киниэхэ анаммыт пааматынньыктаах сквер балаҕан ыйыгар аһыллыаҕа. Кындыл дууһа кылын таарыйар айымньыларын өрөспүүбүлүкэ бастыҥ театрдара фестивальга көрдөрүөхтэрэ. Ити уонна да атын киэҥ далааһыннаах тэрээһиннэр быйыл Бүлүү улууһугар ыытыллыахтара.