Быыстапка бастакы күнүгэр Саха сирин экспозициятын РФ бырабыыталыстыбатын бэрэссэдээтэлэ Дмитрий Рогозин көрдө-иһиттэ.

Республика тыатын хаһаайыстыбатын бырайыактарын миниистир Иван Слепцов билиһиннэрдэ. Китай инвестордарыгар анаммыт сэттэ бырайыак ханна да суох уратылаахтар.

Бастакы бырайыак - «Тыа хаһаайыстыбатын бородууксуйатын сублимационнай куурдуу». Таба муоһуттан, хааныттан, о.д.а. оҥоһуллубут биологическай эбилик, иккис – «Нерюнгритааҕы көтөр фабрикатын бройлеры оҥорон таһарыытын сылга 6300 тоннаҕа диэри тиэрдии», үһүс – «Хатастааҕы сибиинньэни иитэр комплексын төрүүр сибиинньэ ахсаанын 1512 диэри тиэрдии", төрдүс – «Саха сирин оҕуруотун аһа» үүнээйи логистическай киинэ - хортуоппуйу уонна оҕуруот аһын үүннэрии, бэһис – «Дьокуускай куоракка оҕуруот аһын сылы эргиччи үүннэрии», алтыс – «Дьокуускайга «Сайсары» бааһынай ырыынагын иккис уочаратын тутуу, сэттис – Саха сиригэр балыгы астыыр собуоту тутуу.

Саха сирин инвестиционнай кыаҕын көрдөрөр экспозицияларын от ыйын 1 күнүгэр киэҥник көрдөрдүлэр.