Куонкуруска мустубуттары Култуура киинин дириэктэрэ М.И. Монастырева эҕэрдэлээтэ, олунньу ый сиэрин-туомун билиһиннэрдэ. Үлэ Геройа В.М. Кладкин аатынан модельнай библиотека сэбиэдиссэйэ Т.П. Ефремова Саха сирин 100 бастыҥ суруйааччыларын кинигэлэриттэн, саха суругун-бичигин төрүттээбит лингвист-учуонай С.А. Новгородов, буойун-поэт Г.И. Макаров-Дьуон Дьаҥылы олохторун, үлэлэрин көрдөрөр стендэлэри оҥорон туруорбутун биир-биир көрдөрөн кэпсээтэ.

Олохтоох дьаһалтаттан Л.И. Ефремова кыттыылаахтары саха суругун-бичигин төрүттээбит С.А. Новгородов төрөөбүт нэһилиэгэр кэлбиттэринэн эҕэрдэлээн, ситиһиини баҕарда, „Уран тыл“ куонкуруһу аһыллыбытынан аахта. Быйыл күрэскэ 15 ыччат кытынна. Дьүүллүүр сүбэни ыччат политикатын отделын салайааччы С.С. Ноговицын салайда.

Балаһыанньа быһыытынан кыттааччылар бастакы түһүмэххэ Кыайыы 70 сылыгар аналлаах тиэмэҕэ, иккис түһүмэххэ хоһоону өйтөн ааҕыыга, үһүскэ талан ылбыт тиэмэлэригэр бэйэлэрин көрүүлэрин дакылааттыахтаахтар.

Аҕа дойду Улуу сэриитин тиэмэтигэр ыччаттарбыт бэйэлэрин биир дойдулаахтарын - Г.Д. Протодьяконов, С.Д. Флегонтов, С.Т. Ноговицын, о. д. а. хорсун быһыыларын, буойун суруйааччылар Н.Д. Слепцов—Туобулаахап, Г.И. Макаров—Дьуон Дьаҥылы фроҥҥа сылдьыбыт кэмнэрин кэпсээтилэр. Дириҥтэн Егор Адамов эһээтэ Петр Егорович Адамов, Одьулуунтан Туйаара Максимова кэргэнин эһээтэ Петр Николаевич Максимов, Алена Эверстова аймахтара Гаврил Семенович, Иван Семенович Эверстовтар Аҕа дойду Улуу сэриитигэр кыттыыларын, кинилэринэн сиэннэрэ, хос сиэннэрэ киэн тутталларын, кэриэстииллэрин туһунан кэпсээбиттэрэ истээччилэр биһирэбиллэрин ылла.

Хоһоон ааҕыытыгар Хайахсыттан Игнатий Каженкин, Мындаҕаайыттан Анастасия Спиридонова, Чурапчыттан Петр Дьяконов ордуктара көһүннэ.

Талан ылбыт тиэмэҕэ бэйэ санаатын этиигэ иҥнэн-толлон турбакка, аһаҕастык саҥарбыттара-иҥэрбиттэрэ дьүүллүүр сүбэни астыннарда. Ол курдук, Игнатий Каженкин „Мин нэһилиэк баһылыга эбитим буоллар“, Туйаара Максимова „Оҕону иитиигэ дьиэ-кэргэн оруола“, Анна Седалищева (Бахсы) “Ыччаты куһаҕан дьаллыктан тэйитиигэ үлэ“ тиэмэлэргэ дьоһуннаах дакылааттары оҥордулар.

Түмүккэ „Кылаан чыпчаал“ (Гран-При) хаһаайынынан Игнатий Каженкин буолла. Бастакы степеннээх дипломанынан Анастасия Спиридонова, иккис степеннээх дипломанынан Егор Адамов, үһүс степеннээх дипломанынан Туйаара Максимова буоллулар. Кинилэр ыччат политикатын отдела олохтообут анал дипломнарынан, бириистэринэн наҕараадаланнылар.

Николанна Бушуева ийэтин Анна Ивановна Бушуева аатынан олохтообут анал номинациятынан Евдокия Аржакова (Төлөй) наҕараадаланна. „Хомоҕой тыллаах этээччи“ - Григорий Сазонов (Хадаар), „Кэскиллээх этээччи“ - Петр Дьяконов (Чурапчы) ыллылар. Суругу-бичиги төрүттээбит С. А. Новгородов аймаҕа Ольга Никитична Новгородова олохтообут „Көрөөччү биһирэбилэ“ анал бирииһин бэйэтин хоһоонун аахпытМихаил Ивановка (Мугудай) туттарда.

Нэһилиэк дьаһалталарыттан кэлбит бэрэстэбиитэллэр бэйэлэрин ыччаттарыгар анал бириистэри туттартаатылар.