Бу күннэргэ куорат поликлиникаларын быраастара корь тарҕаныытын сэрэтэр туһуттан ыарыһаҕы кытары алтыспыт дьон олорор сирдэригэр тиийэн, ыарыыны сэрэтэр быһыылары биэрэллэр.

Саха Өрөспүүбүлүкэтин кылаабынай санитарнай бырааһа Маргарита Игнатьева Дьокуускайга корь нэһилиэнньэ ортотугар салгыы тарҕанар кутталлааҕын туһунан иһитиннэрдэ.

Дьокуускайга балаһыанньа уустугун учуоттаан, СӨ Роспотребнадзор управлениета кэккэ сорудахтары толорорго уураах таһаарда:

• 18-тан үөһээ саастаах, урут быһыы ылбатах эбэтэр ыалдьыбатах, кору утары быһыы ылбытын бигэргэтэр докумуона суох эбэтэр биирдэ эрэ быһыыны ылбыт дьоҥҥо быһыыны иккистээн биэрэргэ;

• СӨ Бырабыыталыстыбатыгар санитарнай-эпидемияны утары үлэлиир хамыыһыйа уочарата суох мунньаҕар корь быһыытын атыылаһарга эбии үбү көрүү боппуруоһун туруорсарга;

• СӨ Доруобуйа харыстыбалын министиэристибэтигэр, доруобуйа харыстабылын куораттааҕы управлениетыгар, өрөспүүбүлүкэ эмтиир тэрилтэлэрин салайааччыларыгар кору утары быһыыны иккистээн ыытыыны хааччыйарга. Үөскээбит балаһыанньаны учуоттаан, быһыыны олорор дьиэлэргэ уонна үлэлиир сирдэригэр сылдьан биэриини хааччыйарга;

– РФ Сокуонугар сөп түбэһиннэрэн, туһааннаах дьаҥы утары быһыы ылбатах эбэтэр урут ыалдьыбатах медицинскэй үлэһиттэри үлэҕэ ылартан быстах кэмҥэ туттунарга эбэтэр үлэтиттэн тохтоторго (ыарыы өрө туруута тохтотуллуор диэри). Бу үөрэх тэрилтэлэригэр эмиэ сыһыаннаах;

– Эмчит идэтигэр үөрэнэр устудьуоннар, кору утары быһыы ылбатах буоллахтарына, куорат эмтиир тэрилтэлэригэр практикаҕа уонна дьарыкка сылдьалларын тохтоторго;

• Клиническэй уонна эпидемиологическай көрдөрүүлэринэн корунан ыалдьыбыттара уорбаланар ыарыһахтары инфекция отделениеларыгар сытыаран эрэ эмтииргэ;

• Нэһилиэнньэҕэ кору сэрэтэр туһунан иһитиннэрэр-сырдатар үлэни тиһигин быспакка ыытарга;

• Дьокуускай тэрилтэлэрин салайааччыларыгар үлэһиттэргэ быһыыны ылыыларын эбээһинэстииргэ.

Корь туһунан тугу билэбитий?

Корь – сыстыганнаах ыарыы. Ыалдьыбыт киһи температурата үрдүүр, этигэр улахан бээтинэлэрдээх кыһыл ымынах тахсар, хараҕын салыҥнаах бүрүөтэ, айаҕын көҥдөйө кытарар. Киһи кордаабыт киһиттэн салгынынан (ыарыһах киһини кытары кэпсэтэригэр эбэтэр сөтөллөрүгэр силэ бырдаҥалыырыттан) сыстар.

Вирус олус түргэнник бэриллэр. Ыарыһах киһини кытары кылгас да кэмҥэ уопсастыбаннай транспорга алтыһыыттанн эмиэ сыстыан сөп. Быһыы ылбатах дьон хайа баҕарар саастарыгар ыалдьыахтарын сөп. Улахан киһи ыарыыны, оҕолорго тэҥнээтэххэ, ордук ыараханнык аһарарынан кутталлаах.

Ыалдьыбыт киһи температурата38-39 кыраадыстан үрдүүр, аһыыр баҕата намтыыр, кураанаҕынан сөтөллөр, куолаһа хаахынас буолар, хараҕа кытарар, ардыгар ууланар уонна сырдыктан куттанар буолар. Бу бэлиэлэр ОРВИ-га майгынныыллар. Ол эрэн, тириигэ ымынах тахсыар диэри ураты бэлиэлэринэн сэрэйиэххэ сөп. Холобур, иэдэс, уос, миилэ салыҥнаах бүрүөтүгэр мааннай куруппаны санатар бытархай кытархай бээтинэлэр тахсаллар. Онтон бастакы ымынахтар кулгаах кэтэҕинэн, сирэйгэ, моойго уонна түөс үөһээ өттүгэр, көҥдөй көҕүскэ, илиигэ уонна атахха тахсаллар. Киһи температурата үрдүүр. Ымынах 3-4 хонугунан сыыйа-баайа сүтэр.

Бу маннык бэлиэлэр киһиэхэ билиннэллэр эрэ, суһаллык учаастактааҕы бырааһы дьиэҕэ ыҥырыахха наада.