Куор ыарыы көннөрү инфекция, дьоҥҥо улахан кутталы үөскэппэт. Ол да буоллар, элбэх киһи ыалдьыбатын туһугар медицина тэрилтэлэрэ күүскэ үлэлииллэр: ыарыыны утары быһыы оҥороллор, дьиэлэри кэрийэ сылдьан көрөллөр-истэллэр.

Роспотребнадзор иһитиннэрбитинэн, кэлиҥҥи үс күҥҥэ Дьокуускайга 10 улахан киһи куорунан ыалдьыбыт. Ыалдьыбыттар бары дьаҥтан эрдэ быһыы ылбатахтара биллибит.

«Ыалдьыбыт  10 киһилиин алтыспыт дьону быһаардыбыт. Кинилэр ахсааннара 1000 киһиэхэ тиийэр. Эмп үлэһиттэрэ бу дьону бэрэбиэркэлээтилэр, наада буоллаҕына, быһыы оҥороллор», - диэтэ эпидемиологическай хонтуруол отделын начальнига Любовь Будацыренова.

Куор ыарыынан оскуолаларга, оҕо саадтарыгар карантин киллэриллибэт, ол эрээри быһыыта суох кырачааннар оҕо тэрилтэлэригэр сылдьыылара хаарчахтаныаҕа.

«Дьон олорор сирдэринэн быһыыны босхо ылалларыгар туох да мэһэй суох. Конъюктивит, темпаратура үрдээтэ, эккэ ымынах таҕыста эрэ бырааһы дьиэҕэ ыҥырыҥ», - диэтэ Л. Будацыренова.

Улахан дьоннооҕор оҕолор ортолоругар бу ыарыы тарҕаныытын көрдөрүүтэ намыһах. Тоҕо диэтэххэ, оҕолор бары кэриэтэ быһыы ылбыттар. Төрөппүттэрэ быһыыттан аккаастаммыт оҕолоро олор кутталы үөскэтэллэр.