Комсомольск-на Амуре куорат байыаннай чааһыттан Т-55 тааҥка Бүлүү куоратыгар аҕалылынна

Муус устар 12 күнүн киэһэтигэр Комсомольск-на Амуре куораттан Т-55 тааҥка Бүлүү куоратыгар аҕалылынна.


Тааҥканы көрсүһүүгэ улуус баһылыга С.Н. Винокуров мустубут дьону историяҕа киирэр түгэнинэн эҕэрдэлээтэ, бу Улуу Кыайыы 70 сылын көрсө дьоһун событие буоларын бэлиэтээтэ. Бүлүү куорат мэра А.Г. Шипков, бэтэрээннэр сэбиэттэрин бэрэссэдээтэлин солбуйааччы Н.В. Матвеев, ыччат отделын салайааччы Н.Н. Харлампьев, экстремал сүүрүүк П.С. Наумов эҕэрдэ тыл эттилэр.

Инньэ 2013 сыллаахха улуус баһылыга Сергей Винокуров Москваҕа сырыытыгар Госдума депутата Федот Тумусов көмөтүнэн парламентарийдартан улуус киинигэр туруоруллуохтаах пааматынньыкка анаан Т-34 тааҥканы туруорсубута. Бырайыагы оборона министрэ Сергей Шойгу хара аантан өйөөбүтэ, Госдума оборонаҕа комитетын бэрэссэдээтэлигэр, БМФ Черноморскай флотун командующайыгар Владимир Комоедовка боппуруоһу быһаарарыгар сорудахтаабыта. Кэлин кэккэ биричиинэнэн тааҥка модела уларыйбыта.
Дьэ, онон Улуу Кыайыы 70 сылын бэлиэтээһин иннинэ тааҥка Бүлүүгэ аҕалылынна. Комсомольск-на-Амуре куорат байыаннай чааһыттан кэлбит Т-55 тааҥка ыам ыйын 9 күнүгэр Бүлүү куорат Албан аат болуоссатыгар туруоруллуоҕа.