Сүрүн соруктарынан “Восток-Инжиниринг” хампаанньаны кытта дуогабар түһэрсэн үлэ бэдэрээтин ылбыт “Восточнай Буровой компания” Томтор Таастааҕы айылҕа сэдэх тимир баайдаах сирин “Бураннай” учаастагар геологическай үлэни хайдах ыытан эрэрин миэстэтигэр тиийэн бэрэбиэркэлээһин, тулалыыр айылҕаҕа, киһиэхэ, хамныыр-харамайга туох да хоромньута суох үлэни тэрийии буолар эбит.

Өлөөн эбэҥки национальнай оройуонун дьаһалтатын баһылыга Александр Иванов Москва куораттан кэлбит ХЭТ “ТриАркМайнинг” генеральнай директора Евгений Нешереты, ХЭТ “ВостокИнжиниринг” генеральнай директора Андрей Дедюхины, “Ист” бөлөх бэрэстэбиитэлэ Илья Попову кытта көрсөн кэпсэттэ уонна үлэни миэстэтигэр билсиһиннэрэ кыһыҥҥы массыына суолунан Томтор Таастааҕы айылҕа сэдэх тимир баайдаах сирин “Бураннай” учаастагар сирдээн ылдьэ сырытта.

Оробуочай бөлөх Дьэлиҥдэ национальнай нэһилиэгин дьаһалтатын кытта көрүстэ. Салгыы дьаһалта баһылыга Николай Семенов ыалдьыттары кыстык суолунан Томтор Таастааҕы айылҕа сэдэх тимир баайдаах сирин “Бураннай” учаастагар тириэртэ.

Айылҕа сэдэх тимир баайдаах сиригэр оробуочай сырыы түмүгүнэн оройуон дьаһалтатын баһылыга Александр Иванов “Сардаҥа” хаһыат корреспонденыгар “Восточнай Буровой хампаанньа” ыытар үлэтэ тулалыыр эйгэҕэ хоромньута суоҕуттан астынарын биллэрдэ.

Учаастакка алта вагончик, буровой установка туруоруллубуттар. Гараж, матырыйааллары харайар ыскылаат тупсаҕайдык тутуллубуттарын бэлиэтии көрбүт. Буровой үлэни ыытар сиргэ анал радиацияны кэмниир оборудование туруоруллан, көрдөрөр фона 14-20 чааска микроренгент эбит. Билиҥҥи бириэмэҕэ буровой установка 45 метрэ дириҥтэн геологическай боруоданы ылан, анал дьааһыктарга мунньан анализка ыытарга бэлэмниир эбит.

“Бураннай” учаастакка үлэни ыытар “ВостокИнжиниринг” ХЭТ хампаанньа (Дедюхин А.Н.) тулалыыр айылҕаҕа хоромньуну таһаарбат инниттэн сири үүттүүр үлэни кыһыҥҥы кэмҥэ муус устар ый 15 күнүгэр диэри эрэ ыытарга былаанныыр.

Оройуон дьаһалтатын баһылыга Александр Иванов Томтор Таастааҕы айылҕа сэдэх тимир баайдаах сирин туһаҕа таһаарыыга үлэлиир “Ростехнология” судаарыстыбаннай хампаанньа сыһыары тэрилтэлэрин бэрэстэбиитэллэрэ геологическай үлэ тэтимиттэн, тэрээһиниттэн астыммыттарын уонна олохтоох муниципальнай тэриллиилэр сир баайын туһаҕа таһаарыыга улахан интэриэстээхтэрин, бииргэ үлэлээһинтэн астыналларын биллэрбиттэр.