Егор Афанасьевич өрөспүүбүлүкэҕэ сир баайын 10% эрэ үөрэтиллибитин, оттон чинчийиллибит баайы туһаҕа таһаарыыттан толлор, куттанар наадата суоҕун чиҥэтэн эттэ. Бу түгэҥҥэ государство бюджеккэ эбии дохуоту киллэрэри болҕомто үөһүгэр тутарын бэлиэттээтэ. Итини тэҥэ сиртэн хостонор баайтан киирбит үп-харчы Саха сирин хас биирдии олохтооҕор туһалыахтаах, ол курдук хамнаһы үрдэтиигэ, олорор саҥа дьиэлэри тутууга, суолу-ииһи оҥорууга, тыа сирдэрин хааччыллыытыгар  ыытыллыахтаах диэн санаанан салайтарарын кини эттэ. Итини таһынан олохтоох ыччат сир баайын хостуур промышленноска түмэ тардыллыахтаах.

Томтордооҕу сир баайын хостооһун эгологияҕа содула суох буоларын хааччыйыыга айылҕа харыстабылын министиэристибэтэ уопсастыбаннай истиини тэрийэригэр Егор Борисов модьуйда. «Дьон дьиҥнээх быһыыны-майгыны булгуччу билиэхтээх», - диэтэ Егор Афанасьевич.