Галина Мозолевская икки оҕолоох тайаҕы хаартыскаҕа түһэрбитин  Виктор Эверстов олоххо дэҥҥэ буолар ситиһиинэн ааттаата. «Мин саныахпар, Байанай Галина илиитин тутуурдаабыт, өттүгүн харалаабыт. Дьон тайах куруук биир эрэ оҕолоох буорларын туһунан үгүстүк этэллэр. Оттон бу хаартыскаҕа — икки», - диэтэ кини.

Виктор уонна Галина тыыннаах айылҕа дьикти уонна бэлиэ көстүүлэрин хаартыскаҕа хатаабыттарыттан үксэ айылҕа харыстабылын министиэристибэтэ бэчээттээн таһаарбыт «Саха сирин айылҕата» альбомугар киирбиттэрэ.

Быыстапкаҕа Виктор Эверстов шарфигынан сирэйин ыга бааммыт, кырыарбыт кыламанаах оҕо аан дойдуга албан аатырбыт, суон сураҕырбыт хаартыската баар. Бу хаартысканы норуоттар икки ардыларынааҕы Рейтер информацитоннай агентство бэчээттээбитин 110 мөл. киһи көрбүтэ. «Бу кэм-кэрдии тухары оҕо төрөппүттэрэ да, аймахтара да миэхэ биллибэтэхтэрэ. Онон, быыстапкаларым аайы ыйыыбын", - диэтэ Виктор Эверстов.

«Сахамедиа» холдинг генеральнай дириэктэрин I солбуйааччы  Афанасий Ноев, айылҕа харыстабылын миниистирин солбуйааччы Семен Яковлев,  «Саха сирэ» хаһыат кылаабынай эрэдээктэрэ Чокуур Гаврильев, СИА кылаабынай эрэдээктэрэ Петр Васильев, Саха сирин суруналыыстарын сойууһун бэрэссэдээтэлэ  Галина Бочкарева, "Саха" НКИК вице-президенэ Тарас Тарасов, «Сахамедиа» хаартыска сулууспатын начальнига Мария Васильева,  уо.д.а. быыстапка үөрүүлээхтик аһыллыбытынан Галина Мозолевскаяны уонна Виктор Эверстовы истиҥник эҕэрдэлээтилэр, үйэтитиигэ сыралаах үлэлэрэ өссө да ситиһиилэнэ турарыгар баҕардылар.