«Ырыынак коньюктуратыгар политическай процесс быһаччы дьайар. Холобур, нефть сыаната чэпчээбит кэмин билигин кэтээн көрөбүт. Гааһы уларытан оҥоруу Россия таһымыгар, ол иһигэр регионнарга сытыытык турар», - диэтэ РНА СО нефть уонна газ проблемаларын институтун дириэктэрэ  Александр Сафронов.

Мотуор уматыгын оҥоруу өрөспүүбүлүкэҕэ тутаах суолталаах. Уматыгы атыылаһыыга уонна тустаах сиригэр диэри тиэрдиигэ сылын айы өрөспүүбүлүкэ бюджетыттан элбэх үп-харчы ороскуоттанар. Углеводороднай сырьеттан уматык араас көрүҥүн оҥоруу кыаҕа ситэри туһаныллыбатын кэриэтэ.

«Саха сиригэр ньиэби уларытан оҥоруу ночоото улаханынан, бу биһиэхэ табыгаһа суох. GTL технологиятынан гааһы уларытан оҥоруохтаахпыт. «ЯТЭК», «Сахатранснефтегаз» курдук улахан компанияларга итинник кыах баар. Хаһан эрэ Дания "Хальдор Топсе" копманиятын кытта кэпсэтии барбыта эрээри, тохтоон хаалбыта. Маннык уларытан оҥорууну тэрийэргэ, холобур, 1 млрд куб м гааһы уларытарга 1 млрд доллар кээмэйдээх инвестиция наада. Омук дойдуларын компаниялара инвестициялыахтарын сөп, ол эрээри өрспүүбүлүкэ эрэ иһинээҕи наадыйыыны толуйуу кинилэри инэриэһиргэппэт буолуон сөп», - диэнСафронов бэлиэтээтэ. 

«ЯТЭК» уонна Дьокуускайдааҕы гааһы переработкалыыр собуот бэрэстэбиитэллэрэ айылҕа гааһыттан уматыгы оҥорууга улаханнык саарбахтыылларын биллэрдилэр. Билигин оҥоһуллар газоконденсат өрөспүүбүлүкэ наадыйыытын тилэри хааччыйарын кинилэр чиҥэтэн эттилэр.

Промышленность министиэристибэтин санаатын миниистири солбуйааччы Андрей Синяков тиэртэ. Газохимия уонна гааһы уларытан оҥоруу эбийиэктэрин тутарга үгүөрү үп-харчы наада. Аччаабыт саппааһы, ол иһигэр углеводороднай сырьену толуйарга геологоразведочнай үлэ күһүрүөхтээҕэр кини тохтоото.

Мотуор уматыга буолар кыахтаах оттугу Саха сиригэр оҥорон таһаарыы туһунан кэпсэтии бүгүн эрэ саҕаламматаҕа. Бу тэрээһиҥҥэ оҥоһуллубут дакылааттарга этиллибитинэн, инвесторы көрдөөһүҥҥэ, бу боппурос экономическай өттүн ырытыыга кыһалҕалар бааллар.