Балаҕан ыйын 1 күнэ хас биирдиибитигэр долгутуулаах, бэлиэ күн. Биһиги бары бу бэлиэ түгэни ааспыт, билбит дьоммут. Хас биирдии киһиэхэ бу үтүө күн ураты өйдөбүл буолан сөҥөн сылдьар. Киһи олоҕун устатын тухары үөрэнэр. Оскуолатааҕы сыллар киһи аймахха эрэ барытыгар олук уурар улахан суолталаах, кэрэ-бэлиэ кэрдиис кэминэн буолаллар.

Быйыл аан бастаан оскуола аанын аһар кырачаан саҥа көлүөнэ дьону, кинилэр төрөппүттэрин уонна кинилэри иитиэхтээх-үөрэтиэхтээх учууталлары анаан, туспа эҕэрдэлиибин! Эһиги тускутугар барыта дьоллоох, үөрүүлээх, ситиһиилээх эрэ буоллун!    

Быйылгы дьылга өрөспүүбүлүкэҕэ «Үөрэх туһунан» саҥа сокуон ылыныллыаҕа. Бэйэбит сокуоммутугар Российскай Федерацияҕа ылыныллыбыт үөрэх саҥа сокуонугар олоҕуран, национальнай республика уратыларын аахсар, оҕону төрүт айылгытыттан тэйиппэт дьаһаллары киллэрэ сатыахпыт. Биһиги сокуоммут Саха сиригэр үөрэх эйгэтигэр ылыллар атын сокуоннарга төрүт быһыытынан ылыныллыаҕа. Федерацияҕа оҥоһуллар үөрэх сүрүн программаларын оҥорсууга уонна ырытыһыыга өрөспүүбүлүкэ ситэриилээх былааһа федеральнай былаас уорганнарын үлэлэригэр быһаччы кыттыах тустаах. Сокуонунан мэктиэлэнэр биһиги  бырааппытын «Үөрэх туһунан» өрөспүүбүлүкэ саҥа сокуонугар былаас уорганнарын эбээһинэстэрин быһыытынан киллэриэхпит.  

 Ытыктабыллаах оҕолор, төрөппүттэр, учууталлар! Дойдуга саҥа үөрэх сыла саҕаланар. Саҥа көлүөнэ үөрэнээччилэр кэлэллэр, үөрэтиигэ саҥа ирдэбиллэр туруоруллаллар. Биһиги үөрэтии уонна иитии тиһигэр үлэбит эмиэ тупсан, сайдан иһиэхтээх. Оҕо айар талаанын, кыаҕын таба көрөн, өйөөн, сайыннаран, оскуолаттан саҕалаан кинини олох киэҥ аартыгар бэлэмнээх гына иитэн-үөрэтэн таһаараргытыгар баҕарабын. Саҥа үөрэх сыла саҕаламмытынан барыгытын эҕэрдэлиибин!

Саха Өрөспүүбүлүкэтин Ил Түмэнин Бэрэссэдээтэлэ А.Н.Жирков