Ол туһунан, ХИБҮ Педагогическай үнстүүтүн салайааччыта Алексей Голиков кулун тутар 19 күнүгэр, “ХИБҮ Педагогическай хайысхалаах устудьуоннарын уопсай үөрэхтээһин БСҮөС олохтооһуҥҥа бэлэмнээһин” диэн төгүрүк остуолга эппитэ. “ХХI үйэ үөрэҕириитин систиэмэтин туһунан кэпсэтэрбитигэр, үөрэхтээһин түргэнник уонна күтүөннээхтик уларыйарын өйдүөхтээхпит - диэн Алексей Голиков этэр-оҕо анал социокултуурунай контекска сайдар, уонна кини бары дьарыга быраактыка хайысхатыгар салайыллыбыт буолуохтаах. Технология диэн бэйэ сыала буолбатах, бу оҕону иитиигэ уонна үөрэтиигэ, хааччыйар уонна өйүүр бырассыас буолар. Бу систиэмэ наар саҥардылла туруохтаах”. Билигин үнстүүт, базовай площадкалар чэрчилэринэн, Саха сирин оскуолаларын кытары үлэни ыытар диэн бэлиэтээтэ. Бу күннэргэ Хотугулуу-Илиҥҥи бэдэрээссийэлии үнүбэрсиэт уонна Дьокуускай куорат мэрийэтэ, оскуола иннинээҕи үөрэхтээһиҥҥэ, үөрэх-методическай ресурсатын оҥорууга сөбүлэҥ түһэристилэр. Биир оннук кэтээн көрөр тэрилтэлэринэн, 120 оҕоҕо анаммыт, соторутааҕыта арыллыбыт “Сказочная страна” оҕо киинэ буолла. Дакылааттааччы эппитинэн, билиҥҥи оҕо иһитиннэрии сүүрээнинэн хам тутуллар.

“Биһиги үүнэр көлүөнэ ыччаты, оҕолору болҕойон үөрэтиэхтээхпит,-диэн ХИБҮ этнокултуурунай үөрэхтээһинин лабороториятын салайааччыта Ульяна Винокурова бэлиэтээтэ. Оҕоҕо этническай култуураны үөрэтэр сүрүн соруктаахпыт. Бу төрөөбүт тылы уонна нуучча эрэ тылын үөрэтии эрэ буолбатах, манна култуураны, үгэһи уонна олоҕу-дьаһаҕы үөрэтии эмиэ киирэр”.