Хас биирдии пионер баһаатайыгар аалай кыһыл хаалтыстаах, горн, барабан ньиргиэрдээх пионерскай сбордар, кутаа тула түмсүүлэр күн бүгүнүгэр диэри умнуллубаттар, өйгө-санааҕа үтүө өйдөбүл буолан хатана сылдьаллар. Дьону, оҕолору түмэ тардан кыһамньылаах уонна сатабыллаах үлэни тэрийбиккит, биир санаанан салайтаран үгүс үтүө хамсааһыны саҕалаабыккыт.

Эдэр көлүөнэ дьон – кэнчээри ыччаты иитиигэ күннэтэ кыһаллар оҕо түмсүүтүн салайааччылара, тэрийээччи-педагогтар уруккуну умнубакка, пионерия үтүө үгэһигэр тирэҕирэн айымньылаахтык үлэлииллэр, оҕо хамсааһынын саҥа таһымҥа таһаарарга дьулуһаллар.

Биһини өрөспүүбүлүкэбит Ил Дархана 2013 сыл саҥатыгар иитии-үөрэтии тиһигин сайыннарар, ситэрэн-хоторон биэрэр сыалтан бытанан, ойдон олорор оҕо түмсүүлэрин биир сомоҕо хамсааһыҥҥа холбууру сөптөөҕүнэн ааҕан, маныаха бары күүһү-күдэҕи туһаайыахха диэн үөрэхтээһин бары үлэһиттэрин, улуус-нэһилиэк дьаһалталарын, общественноһы ыҥырбыта. Бу кэмтэн ыла бары да сэргэхсийэн, үлэни сааһылаан, дьону түмэн-хомуйан оҕо хамсааһынын саҥалыы тэрийэн барбыппыт.

Икки сыл кэриэтэ үлэлэһэн, чинчийэн-ырытан оҕо тэрилтэтин үс сүһүөхтээх саҥа программатын, алын сүһүөх оҕолоро үөрэх программатын чэрчитинэн оҕо түмсүүтүн туһунан сүрүн өйдөбүллэри иҥэринэллэрин гына эбии үөрэхтээһин программатын, өрөспүүбүлүкэҕэ оҕо хамсааһынын сайдар концепциятын оҥорон түмүктээтибит. Маны таһынан хас биирдии оҕо түмсүү активиһа буоларын туоһулуур анал бэлиэни, атрибутиканы, символиканы оҥордубут, лидердэр уонна актыбыыстар таһаарыылаах үлэлэрин бэлиэтиир анал наҕараадалар бэлэмнэннилэр. Оҕо общественнай түмсүүтүн суолтатын үрдэтэр инниттэн Ил Дархан Е.А.Борисов ыйааҕынан ахсынньы 5-гэр Оҕо хамсааһынын күнэ диэн анал бырааһынньык олохтоммута.

Үөһэ этиллибит үлэ барыта кэнчээри ыччат олоххо көхтөөх, тус санаалаах, сайдарга бэлэм киһи буолан тахсарыгар туһаайыллар. Бу үтүө хамсааһыҥҥа бука бары кыттыһыах, саҕалааһын үлэни тэрийсиэх тустаахпыт. Биһиги ветераннарбыт, аҕа көлүөнэбит өр сылларга баҕа санаа оҥостубут кэмэ – оҕо хамсааһынын сөргүтүү кэмэ – дьэ тиийэн кэллэ. Маныаха сүргэбит өссө көтөҕүллэн, олорон хаалбакка, сөптөөхтүк уонна эйэлээхтик дьаһанан иннибит диэки дабайан иһиэхтээхпит.

Ытыктабыллаах ветераннар! Ыам ыйын 19 күнэ – Пионерия күнэ – үтүө үгэс буолан элбэх көлүөнэ ыччаты сыллата ахсын түмэр. Билигин, урукку курдук, хас оскуола ахсын оҕо тэрилтэлэригэр үөрүүлээх линейкалар, коммунарскай сбордар, станциянан оонньуулар, тимуровскай үлэлэр, костердар, оҕо тэрилтэтин кэккэтигэр ылыы тэрээһиннэрэ ыытыллаллар, кэлиҥҥи сылларга быдан суолталанан, сөргүтүллэн эрэллэр. Бу – көлүөнэ икки ардыгар ситим уонна ытыктабылах сыһыан баарын туоһута!

Үүнэр көлүөнэ аатыттан холобур оҥостор ытык-мааны аҕа көлүөнэ дьоммутун үтүө сыһыаҥҥыт, сүбэҕит-амаҕыт, кэрэҕэ уһуйуугут, истиҥ кыһамньыгыт иһин барҕа махталбытын тиэрдэбит! 

Геннадий Охлопков,

Саха Өрөспүүбүлүкэтин «Дьулуур» оҕо хамсааһынын бэрэссэдээтэлэ