Театр фойетыгар баар дьоҥҥо барыларыгар М.Е. Николаев кинигэлэрин уонна «Билиигинэн кыайыаҥ!» диэн стипендия туһунан буклеты түҥэттилэр, «Музыка мин олохпор» диэн оҕо уруһуйун республикатааҕы быыстапката тэрилиннэ.

«Scientiavinces. Билиигинэн кыайыаҥ. Бастакы президент М.Е. Николаев». Итинник тыллар түөскэ кэтиллэр уонна остуолга ууруллар бэлиэлэргэ суруллубуттар, «Билиигинэн кыайыаҥ» диэн тустаах стипендияны СР бастакы президенэ М.Е.Николаев 2002 сыллаахха олохтообута. Михаил Ефимович сылын аайы бэйэтин төрөөбүт күнүгэр, сэтинньи 13-гэр, стипендияны республика бастыҥ учууталларыгар уонна үөрэнээччилэригэр ураты эрэл уонна өйөбүл быһыытынан туттарар.

Үөрүүлээх тэрээһини бастакы президент туһунан Христофор Горохов сонеттарынан уонна П.Н. Харитонов - Ойуку хоһоонунан астылар. Поэтическай композицияны культура уонна искусство коллеһын студеннара көрдөрдүлэр. Итини таһынан Дьокуускайдааҕы 1 №-дээх Оҕо искусствотын оскуолатын концертнай хора Рахманинов "Славься" хорун циклын толордулар.

Тэрээһин кыттыылаахтарыгар анаан Михаил Николаев өссө 1927 сыллаахха Саха сирин бастакы правительствотын талааннаах салайааччыта Платон Ойуунускай «Сүүс сыллаах былааныгар» өскөтүн эппиэтинэстээх уонна чиэһинэй буоллаххына, куттаммакка хорсун уустук хаамыыларын оҥоруохха уонна иннигэр туруоруммут сыалы ситиһиэххэ сөп диэн эппитин бэлиэтээтэ. Кини өтө көрүүлэрэ үксүлэрэ туолбуттара, холобур, көннөрү саха оскуолатыгар эдэр айылҕаны чинчийээччилэр уопуттары уонна научнай арыйыылары оҥоруохтара, дьон күннээҕи кыһалҕаларын быһаарарга көмөлөһүөхтэрэ диэбитэ.

«Билиигинэн кыайыаҥ!» стипендия лауреаттарын общественнай кэмииссийэ быһаарар. Кэмииссийэ чилиэннэринэн М.К. Аммосов аатынан Хотугулуу-Илиҥҥи федеральнай университет стратегическай хайысхаҕа уонна научнай-инновационнай үлэҕэ бастакы проректора Василий Васильев, «Кэскил», «Юность Севера» хаһыаттар редактордара Нина Протопопова, Россия наукаларын академиятын сүбэһитэ, Россия наукаларын академиятын член-корреспондена, СР Наукаларын Академиятын академига Никита Соломонов, СР Национальнай библиотекатын директора Валентина Самсонова, АГИИК научнай-чинчийэр киинин салайааччыта Ульяна Винокурова үлэлээтилэр.

Эҕэрдэ тылынан 2006 сыллаах стипендия лауреата, Дьокуускай 17 №-дээх оскуолатын математикаҕа учуутала Любовь Макарова эттэ.

Ити кэнниттэн стипендиялары туттарыы сиэрэ-туома буолла. Бириэмийэлэр М.В. Ломоносов аатынан МГУ органическай химияҕа кафедратын доценыгар, химическай наука докторыгар, Россия наукаларын Академиятын химияҕа бириэмийэтин лауреата Александр Георгиевич Мажуга, куораттааҕы лицей үөрэх чааһыгар директоры солбуйааччыта Юлия Анатольевна Афонюшкина, Алдан куорат 1 №-дээх оскуолатын физикаҕа уонна астрономияҕа учууталыгар Андрей Всеволодович Верховод, музыка Үрдүкү оскуолатын оркестровай духовой инструменнар кафедраларын преподавателэ Лена Владимировна Дедюкина, Ньурба техническэй лицейын 9 кылааһын үөрэнээччитэ Семен Верховцев, музыка Үрдүкү оскуолатын Анал фортепиано кафедратын 5 курсун студентката Нина Захарова, Республикатааҕы лицей 11-с кылааһын үөрэнээччитэ Алина Готовцева туттулар.

Тэрээһин концертнай чааһын Дьокуускайдааҕы 1 №-дээх Оҕо искусствотын, Покровскайдааҕы Оҕо искусствотын оскуолаларын, Дьокуускайдааҕы хореографическай колледж үөрэнээччилэрэ, Суорун Омоллоон аатынан Государственнай опера уонна балет театрын артыыстара киэргэттилэр, диэн культура уонна духуобунай сайдыы Министерствотын пресс-киинэ иһитиннэрэр.