Быйылгыттан ыла оскуола иһинэн "Сыккыыс" сайыҥҥы лааҕыр үлэлиир. Манна оҕолор  оҕуруот аһын арааһын олордоллор. Итини таһынан оскуола 20-чэ төбө сүөһүнү иитэр.

Балыктаах оскуолатыгар билигин уопсайа 147 оҕо үөрэнэр, 32 учуутал үлэлиир. Быйылгы үөрэх түмүгүнэн оскуоланы 27 оҕо бүтэрбититтэн 25 оҕо үөрэххэ киирдэ.

Былырыыҥҥаттан саҕалаан бэтэрээн учууталларга анаан"Учуутал скверигэр" көҕөрдүү үлэтин ыыппыттара.

Өрөспүүбүлүкэҕэ, улууска ыытыллар араас тэрээһиннэргэ, агро-оскуолалар күрэхтэһиилэригэр Балыктаах орто оскуолата ситиһиилээхтик кыттарын туһунан үөрэн-көтөн туран дириэктэри иитэр үлэҕэ солбуйааччы Надежда Осипова кэпсиир.

Быйылгы үөрэх дьылыгар оскуолаҕа физкультура, технология, физика уруоктарын биэрэр үс эдэр  учуутал  үлэлии кэллэ.

Агро-оскуола бырагырааматыгар тирэҕирэн учууталлар бэйэлэрин үөрэтэр предметтэригэр саҥа саҕалааһыннары, сонун толкуйдары куруук киллэрэллэр. Математика учуутала Светлана Габышева күннээҕи олох чахчытын уруогар туттар. Оҕолорго сорудах быһыытынан биэрэр садаачаларын үөрэнээччилэр дьиэ-кэргэттэрин хаһаайыстыбаларыттан ылар. Холобур, Стручковтар хас ынахтаахтарый? Бу сүөһүлэрэ төһө отунан сыл тахсыахтаахтарын суоттууллар. Маннык садаачаҕа от үлэтигэр, тиэхиньикэ уматыгар төһө ороскуоттаналларын уонна түмүгэр төһө барыстаналларын үөрэтэ сылдьар.

Оскуола быйыл бэйэтин оҕуруотуттан 50 куул хортуоппуйу ылла.Ону тэҥэ хаппыыстаны, моркуобу, сүбүөкүлэни, оҕурсуну, помидору, укуруобу дэлэйдик хомуйдулар.

Балыктаахтааҕы агро-оскуола быйыл ахсынньы ыйга 70 сылын бэлиэтиир. Бу үөрүүлээх тэрээһини үөрэнээччилэр, учууталлар бука бары сүргэлэрэ көтөҕүллэн, туйгун үөрэҕинэн уонна күүрүүлээх үлэнэн көрсөллөр.

Сырдыгы, үтүөнү, үйэлээҕи тарҕатар учууталлар бэлиэ күннэринэн оскуола коллективын истиҥник эҕэрдэлиибит!