Кини 50-тан тахса сыл саха литературатын уонна лирературнай кириитикэ историяларын үөрэппитэ, республика иһигэр уонна тас өттүгэр улахан ааттаах-суоллаах учуонай быһыытынан биллэр.

Василий Протодьяконов лекцияларыгар саха тылын уонна литературатын хас да көлүөнэ учууталлара, литературнай кириитиктэр, суруналыыстар үөрэнэн, уһуйуллан тахсыбыттара.

 В.Н. Протодьяконов – Аҕа дойду Улуу сэриитин уонна үлэ бэтэрээнэ, РФ үөрэҕириитин туйгуна, СР үөрэҕириитин үтүөлээх үлэһитэ. Государственнай Мунньах (Ил Түмэн) бочуотунай грамотатынан, РФ үрдүкү оскуолатын бочуотунай грамотатынан, «Уһун кэмнээх, үтүө суобастаах үлэ иһин» ХИФУ, «РФ үрдүкү профессиональнай үөрэхтээһинин бочуоттаах үлэһитэ», «Учууталлар учууталлара» ааттарынан наҕараадаламмыта. П.А.Ойуунускай аатынан государственнай бириэмийэ лауреата.

Протодьяконов В.Н. – СР театр деятеллэрин сойууһун чилиэнэ, Россия норуоттарын драматургтарын айымньыларын сахалыы тылбаастаабыта, П.А.Ойуунускай дьылҕатын туһунан айымньы ааптара. Бу айымньыга тирэҕирбит А.С.Борисов туруоруута П.А.Ойуунускай аатынан саха академическай театрын бастыҥ классическай туруоруутун быһыытынан биллэр. Василий Никитич театр кириитигэ, ХХ үйэ бастыҥ ырыаларын ахсааннарыгар киирсибит икки ырыа ааптара. «Чолбон» литературнай-уус уран сурунаалга А.Е.Кулаковскайга, А.И.Софроновка, П.А.Ойуунускайга анаммыт рубрикалаах.