Кини 1914 сыллаахха элбэх оҕолоох дьиэ кэргэҥҥэ бастакы оҕонон күн сирин көрбүтэ. Аҕата Огочонов Савва Михайлович уонна ийэтэ Архипова Мария Николаевна сүөһү иитэллэрэ, балыктыыллара, бултууллара.

Варвара Саввична оҕо эрдэҕинэ кини төрөөбүт Сургуулугар оскуола суоҕа, онон кини үөрэҕи ылбакка хаалбыта. Дьонугар дьиэ хаһаайыстыбатыгар көмөлөһөрө. Сэбиэскэй былаас олохтоммутун кэнниттэн кини холкуос чилиэнэ буолбута, ыанньыксыттаабыта, сүөһү көрбүтэ. И.В. Сталин, М.И. Калинин ааттарынан холкуостарга Үөһээ-Бүлүү Сургуулугар, Маҕааһыгар үлэлээбитэ.

Варвара Саввична 1968 сыллаахха 54 сааһыгар бочуоттаах сынньалаҥҥа тахсыбыта. Ол да буоллар сүөһүнү иитиигэ күүһэ-кыаҕа тиийэринэн үлэлээбитэ. Мас кэрдэрэ, хачыгаардыыра.

Сүөһүнү иитиигэ күүрүүлээх үлэтин иһин «Ударник коммунистического труда» үрдүк аатынан бэлиэтэммитэ. «Ударник пятилетки», «Победитель социалистического соревнования» бэлиэлэри туппута, сопхуос, ССКП оройуоннааҕы кэмитиэтин бочуотунай грамоталарынан наҕараадаламмыта. 1946 сыллахха «За доблестный труд во время Великой Отечественной войны 1941-1945 гг.» мэтээлинэн наҕараадаламмыта. Кини тыыл уонна үлэ бэтэрээнэ.

100 сааһын томточчу туолбут Варвара Саввична билигин быраатыгар Иннокентий Саввичка олорор. Үчүгэй көрүүлээх-истиилээх, чөл олоҕу тутуһар буолан, кини билигин да чиҥ доруобуйалаах.