Спартак Федотов 1955 сыллаахха ССРС Малай театрын иһинэн М.С.Щепкин аатынан Москватааҕы үрдүкү театральнай училищены үөрэнэн бүтэрбитэ. Онно саха бастакы студиятыгар Анна Кузьмина, Михаил Гоголев, Татьяна Мыреева, Мария Канаева, Аксинья Адамова, Александр Иванов, Федот Потапов, Лазарь Сергучев уо.д.а. буолан ССРС народнай артыыската, САССР искусствотын үтүөлээх деятелэ, профессор Вера Николаевна Пашенная салалтатынан театр артыыһын идэтигэр уһуллубуттара. Үөрэҕин кэнниттэн П.А.Ойуунускай аатынан Саха государственнай музыкальнай-драматическай театрыгар артыыһынан үлэлээбитэ.

1958 — 1962 сс. - Үөһээ Бүлүүтээҕи государственнай көһө сылдьар театр артыыһа. 1964 — 1965 сс. - Москваҕа режиссердар үрдүкү курстарыгар үөрэммитэ. 1965 — 1966 сс. - П.А.Ойуунускай аатынан Саха государственнай музыкальнай-драматическай театр директора. 1966 — 1967 сс. - Ньурбатааҕы государственнай көһө сылдьар театр кылаабынай режиссера. 1967 - 1972 сс. - Ленинскэй оройуон культураҕа салаатын сэбиэдиссэйэ. 1972 сылтан бочуоттаах сынньалаҥҥа тахсыар диэри — П.А.Ойуунускай аатынан государственнай театр артыыһа. Нөмүгү нэһилиэгэр театр тэрийэн, режиссерунан үлэлээбитэ.

Спартак Петрович театр сценатыгар үлэтинэн эрэ буолбакка, көрөөччүгэ киинэ артыыһын быһыытынан киэҥник биллэр. Кини «Тайна предков» («Таджикфильм», 1972 г.), «Срочно...Секретно...Губчека...» («Мосфильм», 1982 г.), «Залив счастья» (Свердловскайдааҕы киностудия, 1987 г.), «Шаман» (Франция-Россия, 1996 г.), «Река» («СТВ» кинокомпания, 2002 г.) киинэлэргэ оонньообута. Саха режиссердара Никита Аржаков «Оҕонньор», Вячеслав Семенов «Сайылыкка», «Балыксыт» үлэлэригэр геройдарын уобараһын итэҕэтиилээхтик, көрөөччүгэ тиийимтиэтик арыйбыта. Киинэҕэ биир биллэр үлэтинэн режиссер Никита Аржаков «Снайпер Саха» киинэтигэр Сэмэн Ардахов оруола буолар.

Билигин Хаҥалас улууһун Ой сэлиэнньэтигэр олорор. Саха АССР үтүөлээх артыыһа, (1962 с.) Нөмүгү нэһилиэгин уонна Хаҥалас улууһун бочуоттаах олохтооҕо.

Спартак Федотов кыттыылаах киинэлэртэн кадрдар.