Мунньахха, бастатан туран, үөрэх тэрилтэлэрэ саҥа үөрэх дьылыгар бэлэмнэрин тула кэпсэтии буолла. Быйыл оҕо саадтарын, оскуолалар өрөмүөннэригэр республика бюджетыттан 1 мөл. 938 тыһ. солк., улуустан 2 мөл. 402 тыһ. солк. көрүллүбүт. Улуус баһылыга Евгений Слепцов дьаһалынан үөрэх тэрилтэлэрин саҥа үөрэх дьылыгар тутар хамыыһыйа тэриллибитэ. Хамыыһыйа сүрүн үлэтинэн оҕо саадтарыгар, оскуолаларга туох өрөмүөн үлэтэ ыытыллыбытын көрүү, үлэ хаачыстыбатын хонтуруоллааһын, саҥа үөрэх дьылыгар бэлэмнэрин бэрэбиэркэлээһин буолар. Улууска 25 үөрэх тэрилтэтэ баарыттан, атырдьах ыйын 27 күнүнээҕи туругунан, хамыыһыйа 10 оскуоланы, 11 оҕо саадын, 2 эбии үөрэхтээһин тэрилтэтин тутта. Билигин Хатыҥнаах орто оскуолата уонна „Чэчир“ оҕо саада хаалла.

Үөрүүлээх сонунунан быйыл оскуоланы бүтэрэр 129 оҕо бары аттестат ылбыттара буолар. Атырдьах ыйын 29 күнүнээҕи туругунан, Өлөөкө Күөл, Ойуһардаах, Хатыҥнаах, Сылгы Ыытар, Эбээх орто оскуолаларын уонна улуустааҕы гимназия оҕолоро үөрэххэ 100% киирдилэр. Онон үөрэххэ киирии былырыын 93,9% эбит буоллаҕына, быйыл 95,35 % тэҥнэстэ. Хатыҥнаахха информатиканы, куоракка химияны, Ойуһардаахха обществознаниены, биологияны билии үрдээбит. БКЭ былырыыҥҥы түмүгүн кытта тэҥнээтэххэ, физикаҕа, английскай тылга, географияҕа, нуучча литературатыгар, обществознаниеҕа көрдөрүү тупсубут, ол гынан баран профильнай предметтэргэ (историяҕа, химияҕа, биологияҕа) намыһаҕа бэлиэтэммит. Историяҕа көрдөрүү намыһах буолан, оҕолор тус сыаллаах миэстэни ылыыга да хапсыбатахтар. Онон бу предметтэргэ күүскэ үлэлэһиэххэ наада диэтэ начаалынньык.

Улуус үрдүнэн алын кылаас сүһүөххэ үөрэнэргэ 152 оҕо миэстэтэ аһаҕас турар. Ол курдук, 5-с кылааска Хатыҥнаах, 6-с кылааска Эбээх оскуолаларыгар оҕону эбии ылыахтарын сөп.

Куорат уонна Өлөөкө Күөл оскуолаларыгар педагог-психологтар суохтар, оттон Сылгы Ыытарга үөрэҕэ суох киһи үлэлии сылдьар. Дьиҥэр, хас биирдии үөрэх тэрилтэтигэр психолог баар буолуохтаах.

Арҕахтаах „Чуораанчык“, Березовка „Энкэчэн“, куорат „Сказка“, „Колокольчик“, „Саһарҕа“, Сылгы Ыытар „Кэнчээри“, Сыбаатай „Мичээр“, Хатыҥнаах „Чэчир“ уонна Налимскай “Кэскил” оҕо саадтарыгар миэбэл, маны таһынан, оҕо саадын площадката, куорат оскуолатыгар спортивнай площадка, оскуолаларга кабинеттар, учебниктар, компьютердар, спортивнай оборудование атыылаһыллыбыт, бу барыта навигацияҕа тиэллиэҕэ. Онон улууска оҕо саадтара уонна оскуолалар бары хааччылла сатаатылар.

Кэлии-барыы уустугуттан үөрэх үлэһиттэрин балаҕан ыйынааҕы сүбэ мунньахтара куоракка ыытыллыбатынан сибээстээн, нэһилиэктэри кытта интернет ситимин нөҥүө буолуоҕа. Оттон балаҕан ыйын 12 күнүгэр пленарнай мунньахха куорат уонна Налимскай үөрэх тэрилтэлэрин үлэһиттэрэ кыттыахтара.