Евгений Слепцов тутулла турар дьиэлэр билигин ханнык кэрдиискэ кэлбиттэрин, былааннаммыт кэмҥэ үлэҕэ киллэрэргэ ханнык суһал дьаһаллар ылыллалларын туһунан кылгастык кэпсээтэ. Ону таһынан бу сотору кэминэн саҥа хочуолунайы, оттон аныгыскы нэдиэлэҕэ теплотрассаны боруобалаан холбооһун ыытыллыахтааҕын туһунан иһитиннэрдэ.

Санатан эттэххэ, атырдьах ыйын 26 күнүгэр үлэ графигын быһыытынан, СР правительствотын бэрэссэдээтэлэ Галина Данчикова Орто Халыма куоратыгар бара сылдьыбыта. Сырыы кэмигэр республика премьер-министрэ сааскы халаан кэнниттэн чөлүгэр түһэрэр үлэлэр хаамыыларын уонна кэлэр оттук сезонугар бэлэми билсибитэ. Миэстэтигэр суһал боппуруостар быһаарыллыбыттара, салайар быһаарыылар ылыллыбыттара.

Онно куорат нэһилиэнньэтин кытта көрсүһүү кэмигэр правительство премьерэ куораты тупсарыыга болҕомто уурарга, уулуссаҕа уонна олорор дьиэлэр аттыларыгар бэрээдэги тутуһарга эппитэ. Онон көрсүһүү кэмигэр Галина Иннокентьевна баһылыктан Орто Халыма куоратын уулуссаларыгар төһө бэрээдэк баарын сураста. Евгений Слепцов куора олохтоохторун көхтөөх кыттыыларынан куоракка субботниктар ыытылыннылар, бөҕү-саҕы хомуйдулар, бэрээдэк олохтонно диэтэ.

Министрдэр кабинеттарын баһылыга биир сүрүн боппуруоһунан Березовка нэһилиэгин уу ылбат сиригэр көһөрүү туһунан туһаайда. Билигин РФ правительства бастакы вице-премьерэ Игорь Шувалов РФ региональнай сайдыытын Министерствотыгар биэрбит ыйыыта баар, үлэ ыытыллар. Ол эрээри, диэн бэлиэтээтэ Галина Данчикова, муниципальнай тэриллии баһылыга ити боппуруоска республика министерстволарын уонна ведомстволарын кытта үлэни көҕүлүүрэ наада диэн ыйда.