Мустубут дьону куорат дьаһалтатын баһылыга Варвара Оконешникова эҕэрдэлээтэ, бэтэрээннэргэ бүгүҥҥү уйгулаах олохпутун уһансыбыттарыгар ис сүрэҕиттэн долгуйан туран махтанна. Аан дойду историятыгар буолан ааспыт алдьархайдаах сэрии хас биирдии дойду олохтооҕор умнуллубат өйдөбүл быһыытынан сөҥөн сылдьарын санатта уонна кэлэр көлүөнэҕэ кэпсээнтэн кэпсээн быһыытынан тиэрдиллэн, үйэтитиллэн иһиэ диэн эрэннэрдэ.

Бэтэрээннэр ааттарыттан сэрии кыттыылааҕын огдообото, тыыл бэтэрээнэ Анна Смолко тыл эттэ, сэрии ыар кэмнэрэ хатыламматтарыгар баҕарда. Оччолорго кимиэхэ даҕаны, дойду хайа да муннугар чэпчэки буолбатах этэ диэтэ. Кыратыттан саҕалаан аарыма кырдьаҕаһыгар тиийэ кыайыы иһин турууласпыппыт диэн аҕынна. Анна Николаевна ахтыытын киһи кутун тутар хоһоонунан түмүктээтэ. Бу тылларга сэрии кыһалҕатын этинэн-хаанынан билбит кырдьаҕас туох баар аһыыта, абата-сатата барыта түмүллүбүттэр.

Эдэр көлүөнэ бэтэрээннэргэ истиҥник махтанна. Ол кэннэ Кыайыы Знамята куорат дьаһалтатын баһылыга Варвара Оконешниковаттан Байды нэһилиэгин баһылыгар Василий Оконешниковка туттарылынна. Онон эстафета куораттан Налимскайга барда.

Кыайыы Знамятын Байды нэһилиэгин ытык кырдьаҕастара, тыыл бэтэрээннэрэ Алексей Митрофанович Колесов уонна Анастасия Алексеевна Оконешникова долгуйа туттулар.

Знамяны бэрсиһии кэнниттэн сэрии тиэмэтигэр олус истиҥ эҕэрдэ концерт туруорулунна.