Өлөөкө Күөлүгэр быйыл былаан быһыытынан Дмитрий Созонов аатынан уулуссаҕа диэри 2 км усталаах ититэр ситимҥэ 29 ыал холбонуохтаах, манна 3 тыыл бэтэрээнэ олорор. Билигин уонтан тахса ыал итиини киллэриннэ. Маны тэҥэ үргүлдьү ититэр ситимнэргэ бүрүйүү үлэтэ бара турар.

Былырыын уопсайа 1 км 800 миэтэрэ усталаах киин ититэр ситим тардыллыбыт, онно 18 ыал холбоммут, бу дьонтон үһүгэр нэһилиэнньэ социальнай харалтатын управлениетыттан көмө көрүллүбүт.

Арҕахтаахха ититэр ситимҥэ уопсайа 50 ыал холбонон олорор. Быйыл 8 дьиэ итиини киллэрэрэ былааннанар. 8 ыалтан 4 тыыл бэтэрээнэ буолаллар. Билигин ДьУоКХ үлэһиттэрэ Октябрьскай уулуссаҕа 600 м усталаах трассаны тарда сылдьаллар. Быйыл холбонор дьоҥҥо баһылык Алексей Сивцев сайаапка быһыытынан турбалары, наадалаах матырыйааллары Дьокуускайтан саас аҕалтарбыта. Былырыын Павел Созонов аатынан уулуссаҕа 2 ыал холбоммут.

Сыбаатайга итии балаҕан ыйын 1 күнүгэр бэрилиннэ. Кумаринскай уулуссаҕа ититэр ситим былырыын тардыллыбыта. Быйыл утеплителинэн бүрүйэн биэрдилэр. Билигин былааннаммыт 18 дьиэттэн 4 ыал холбонно. Онон нэһилиэк 60 % киин ититэр ситимҥэ холбонно.

Сылгы Ыытарга быйыл 25 дьиэ холбонуоҕа, бүгүҥҥү күҥҥэ диэри 4 холбоммут ыалга итии бэрилиннэ. Налимскайга, эрдэ этиллибитин курдук, 10 ыал холбоноро былааннанар. Ититэр ситим былырыын тардыллыбыта.

Эбээххэ Илин уонна Арҕаа түөлбэлэргэ 41 дьиэ итиини киллэриэҕэ, 2 км усталаах турба тардыллыаҕа. Манна элбэх аҕа саастаах, 8 тыыл бэтэрээнэ олорор. Билигин номнуо отучча дьиэ холбонно. Дьиҥэр, былаан быһыытынан Портовской уулуссаҕа туттубут эдэр ыаллар эмиэ итиигэ холбонуохтаахтара. Ол гынан баран, сакаастаммыт турба сороҕо кэлбэккэ, эһиилги сылга көһөн биэрдилэр.

Ойуһардаахха уот күнүстэри-түүннэри балаҕан ыйын 1 күнүттэн бэриллэр буолан, итии эмиэ бу күн бэрилиннэ. Арҕаа Эбэ түөлбэҕэ 25, Айхалга 6 ыал итиини холбоноро былааннанар. Нэһилиэк музейа уонна Бэтэрээннэр уулуссаларыгар 2 дьиэ итиини киллэриннэ. Онон быйыл бөһүөлэк 85% барыта итиинэн хааччыллыахтаах.

Хатыҥнаахха итии эмиэ балаҕан ыйын 1 күнүгэр бэрилиннэ. Сайын хочуолунайга кыамтата күүстээх 2 хочуол туруоруллубут. Ититэр ситим от ыйыгар-атырдьах ыйыгар тардылынна. Былырыын нэһилиэккэ 3 тыыл бэтэрээнигэр холбоммут эбит буоллаҕына, быйыл уонча дьиэ былааннаммытыттан 4 дьиэ холбонно.

Березовкаҕа хочуолунай Билии күнүн көрсө итиини холбоото. Былаан быһыытынан 7 дьиэ ититэр ситимҥэ холбонуохтаах этэ, ол гынан баран, турба тиийбэт буолан, бүгүҥҥү күҥҥэ диэри биир да дьиэ холбоммокко турар. Нэһилиэккэ 2012 сыллаахтан уопсайа 10 дьиэ итии киллэстэн олорор.

Быйыл хайа да сыллааҕар элбэх дьиэ итиини киллэстэн, дьон олоҕо тупсарыгар олук уурулунна. Инникитин улуус барыта итиигэ холбоноро былааннанар.