Икки сыллааҕыта бу нэһилиэккэ кулууп дьиэтэ уокка былдьанан күл-көмөр буолбута, ону кытта библиотека баай фондата эмиэ. Олохтоох дьаһалта улуус олохтоохторугар өйөбүлү оҥороллоругар ыҥырыы таһаарбыта. Ону быһа гыммакка, үгүс тэрилтэ, биирдиилээн дьон үбүнэн көмө оҥорбуттара, улуустан, ону ааһан Дьокуускай куораттан кинигэ мунньуллан сыл устата тиэллибитэ. Нэһилиэк култуура дьиэтэ суох хайдах да табыллыбатын өйдөөн, киирбит үп саҥа дьиэ акылаатын түһэриигэ туһаныллыбыта.

Норуот бачыымын республикатааҕы „Мин республикам XXI-c үйэҕэ“ үтүө дьыала хамсааһына өйөөбүтэ уонна эбии үп көрбүтэ. Ол курдук балтараа сыл иһигэр ханна да суох сонун тутуулаах саҥа дьиэ дьэндэйэн таҕыста. Уһук хоту сытар улууска, биллэн турар, матырыйаалы булар уустуктардаах. Киин сиртэн аҕаларга үгүөрү үп наада. Ону ол диэбэккэ, наар күүстээх санаанан тутуу тиһэҕэр тиэрдиллэн, бу күннэргэ саҥа дьиэ малааһына буолла.

Олохтоохтор үөрүүлэригэр ыраахтан-чугастан биир дойдулаахтара кэлэн кыттыстылар. Ол курдук биллиилээх общественнай деятель Ульяна Алексеевна Винокурова кэлэн эҕэрдэтин тиэртэ, алгыс тылын эттэ.