Оруобуна бу күннэргэ Предпринимателлэр улуустааҕы бастакы форумнара ыытылынна. Номнуо бу эйгэҕэ бэйэлэрин суолларын булуммут дьону кытта саҥа саҕалаан эрээчилэр мустан, үгүс боппуруоһу ырыттылар. Ол туохтары диир буоллахха, саамай сүрүнэ — судаарыстыба иннигэр эбээһинэстэрэ. Манна биири бэлиэтиэхпин баҕарабын, ол курдук үөһэ ити бэйэлэрин суолларын булуммут дьон диэн мээнэҕэ эппэтим. Бу кырдьык, олохторун бизнеһи кытта ситимнээбит, бу идэлэриттэн дохуоттанар, ону чопчу өйдүүр уонна салҕыыр санаалаах дьон. Оттон ИП-лар ортолоругар кумааҕыга эрэ сурулла сылдьааччылар аҕыйаҕа суохтар. Биир холобуру аҕалабын, аҕыйах сылтан бэттэх балыктааһыҥҥа сокуон кытааппыта. Любительскэй уонна промышленнай балыктааһын диэҥҥэ араартаабыттара. Онон балыктыыр күөллэри докумуоннааһын саҕаламмыта. Үйэлэрин тухары бултаабыт күөллэрин тутан хаалар инниттэн, балыксыттар ИП буоларга күһэллибиттэрэ. Сорох өттө өйдөөбүтэ, сорох улахаҥҥа уурбакка кумааҕыга эрэ киирбит курдук санаммыта. Дьэ, ол кэннэ кэлэн ыйын аайы докумуон толоруутуттан, нолуок төлүүртэн ордубаппыт диэн айманаллар. Маҥнай киирэр саҕана бу туох буолан эрэбин, миигиттэн туох ирдэнэрий диэн ыйытыах баара. Бу манна сытар, биһиги хаалынньаҥ толкуйбут. Предприниматель диэн — идэ. Бу идэбин толору баһылаан, дохуот ылан айахпын ииттиэхтээхпин диэн санаа бигэтик олохсуйуохтаах.

Онон форум чэрчитинэн ким туох эбээһинэстээҕэ чопчу быһаарылынна. Үлэ түмүгэ таһаарылынна, хардарыта уопут атастаһыыта буолла. "Кулума" сынньалаҥ киинигэр күн аҥаарыгар бастыҥ предпринимателлэр үлэлэрин быыстапка-дьаарбаҥката тэрилиннэ. Тыа хаһаайыстыбатын бородууксуйатын оҥорон таһаарыынан дьарыктанар соҕотох улахан тэрилтэбит - "Амтан" ТХПК - бу күн тугу оҥорор кыахтааҕын дьоҥҥо көрдөрдө. Бары билэбит, тэрилтэ үүт ас хас да көрүҥүн атыылыыр, газированнай утаҕы, ыраас ууну, бурдук аһын оҥорор. Ону кытта эт-балык соҕотуопкалыыр. Дьэ, бу курдук оҥорор кыах баар эрээри, бородууксуйаны батарыыга кыһалҕаны көрсөллөр.

"Гапонов О.В." ИП 2006 сылтан тэриллэн үлэлиир. 2012 сылтан пластик түннүктэри оҥоруунан дьарыктанар. Матырыйаалы аҕалыыга үгүөрү ороскуоту көрсөрүттэн, бородууксуйата Дьокуускай сыанатынааҕар арыый да ыарахан буолан тахсар эрээри, кини хаачыстыбатыгар улахан болҕомтотун уурар. Киинтэн кэлбит түннүктэри кытта өрөмүөннүүр эбит. Олег Владимирович бүгүҥҥү сүрүн кыһалҕатынан анал дьиэтэ-уота суоҕа буолар эбит. Үлэлиир усулуобуйатын тупсарыан, мастарыскыайын кэҥэттиэн баҕарар.

"Алазея" атыы-эргиэн, гостиничнай комплекс хаһаайката Александра Явловская тэрилтэтигэр 22 үлэһиттээҕин эттэ. Бу, биллэн турар, үлэ миэстэтин таһаарыыга бастыҥ холобур. Ол эрээри бу дьонугар социальнай өттүнэн көмүскэллээхбуолууларын хааччыйыыга ыарахаттары көрсөрүн кэпсээтэ. Сыллата үлэһиттэрин айаннарынтөлүүрүгэр ороскуотурарын этэн туран, итиниэхэ судаарыстыба өттүттэн өйөбүл баара буоллар бэрт буолуо этэ диэтэ.

Көрөргүт курдук, кыһалҕа элбэх. Онон син биир судаарыстыба өттүттэн өйөбүл наада. Ол эрээри ким эрэ аҕалан биэрэрин кэтэспэккэ, дьүккүөрдээхтик хамсаныахха, граннарга кыттыахха, биир сиргэ тэпсэҥнээбэккэ саҥа суоллары тобулуохха наада.

Ити курдук, форумҥа истиҥ кэпсэтии таҕыста. Нэһилиэктэн даҕаны кэлбит дьон үгүһү билбиттэрин эттилэр, бу курдук сыллата мустарга этии киллэрдилэр.