Форум саҕаланыытыгар предпринимательствоны өйөөһүн улуустааҕы киинин салайааччыта Светлана Николаенко ааспыт сыллааҕы үлэ түмүктэрин, бу сыллааҕы соруктары билиһиннэрдэ. Оттон улуус баһылыгын экономикаҕа солбуйааччыМарина Ядреева улууска Предпринимательство сылын чэрчитинэн ыытыллар тэрээһиннэр былааннарын билиһиннэрдэ.

Форумҥа болҕомтоҕо нэһилиэнньэни социальнай суолталаах бородууктанан хааччыйыы боппуруоһа турда. Тыын суолталаах аска-үөлгэ сыананы быһыы уустук боппуруос буоларын санатан туран, өрөспүүбүлүкэ сыана политикатыгар судаарыстыбаннай кэмитиэтин бэрэссэдээтэлин солбуйааччы М.В. Лыкова Өймөкөөн арктическай улуустарга киирсибэт буолан, үгүс харгыстар баалларын эттэ. Ол иһин хас биирдии түгэни үөрэтэн, докумуоннары ырытан, сыананы үрдэтэри-үрдэппэти быһаарсыах тустаахпыт, диэтэ. Билиҥҥитэ Российскай Федерацияҕа бородуукта сыанатын үрдэтии муус устар ыйга диэри тохтотуллан турар.

Килиэп социальнай суолталаах бородуукталартан сүрүннэрэ буоларынан, өрөспүүбүлүкэҕэ бурдугу биир сиртэн ыларга анаан «Якутопторг» тэрилтэ тэриллибитэ. Бу тэрилтэттэн килиэп атыыластахха, килиэп сыаната эмиэ атын буолар. Бу барыта нэһилиэнньэ интэриэһин учуоттаан сыана үүнэ-тэһиинэ суох барарын тохтотор сыалтан оҥоһуллар.

Улуус урбаанньыттара таһаҕаһы тиэйии, сибээс, коммунальнай хаһаайыстыба боппуруостарыгар сыһыаннаах боппуруостарыгар бырабыыталыстыба бэрэстэбиитэллэрэ тустаах хоруйдары биэрдилэр, үгүс боппуруос уопсастыбаннас күүһүнэн — общественнай сэбиэттэри тэрийэн, миэстэтигэр быһаарыллар кыахтааҕын бэлиэтээтилэр.

Түмүккэ, улуус баһылыгын социальнай боппуруостарга солбуйааччы Р.М.Садыкова бу тэрээһиҥҥэ мустубут дьон тус дьыала туһунан эрэ буолбакка, бүтүн улуус сайдыытыгар сыһыаннаах боппуруостары көтөхпүттэригэр, оройуоҥҥа ыытыллар тэрээһиннэргэ көхтөөхтүк кытталларын иһин махтанна уонна Улуу Кыайыы 70 сыллаах үбүлүөйүн бэлиэтээһиҥҥэ урбаанньыттар эмиэ биир бастакынан күүс-көмө, өйөбүл буолуохтарыгар эрэнэрин биллэрдэ.