Департамент улуустарга общественнай тэрилтэлэр үлэлэрин көҕүлээн, чуолаан СО НКО коммерческайа суох социальнай салааҕа туһуламмыт тэрилтэлэри кытта үлэлэһэр. Анал грант анаан тыа сирдэригэр, киин куораттарга балачча үптээх бырайыактары өйөөн үлэлэтэр.

Улууспутугар СО НКО диэн тэрилтэлэр ахсааннара сэттэҕэ тиийдэ, мантан ыла сыллата регистрация баран, элбииллэрэ күүтүллэр. Бу СО НКО - лар бары бырайыак суруйан, араас граннарга кыттан, үп киллэринэн нэһилиэктэрин сайыннарар баҕалара улахан. Ол эрэн, юридическай, үп уонна социальнай эйгэ сокуоннарын билиилэрэ ситэтэ суох буолан, ыарырҕатар, мунаахсыйар боппуруостара элбэх.

Чурапчы улууһун дьаһалтата уонна Гражданскай инициативалары өйүүр департамент тэрийиилэринэн, кулун тутар 17 күнүгэр Одьулууннааҕы Аграрнай техникумҥа СО НКО-лар илин эҥэр улуустар форумнара буолла. Тэрээһиҥҥэ түөрт улуустан 114 киһи кэлэн кытынна. Департамент салайааччыта Н.Д.Бугаев, специалист А.С.Николаева, СР Общественнай палататын чилиэнэ, “Харысхал” фонда салайааччыта В.П. Душкевич кэлэн, үс секциянан олус наадалаах интэриэһинэй ырытыылары, үөрэтиилэри ыыттылар, сүбэ-ама биэрдилэр. Бастакы күн түмүгүнэн ыытыллыбыт “төгүрүк остуолга” форуму эһиил атын улууска ыытыаҕыҥ, кварталларынан видеоконференциялары тэрийиэҕиҥ, улуустарга СО НКО үлэтин сүрүннүүр “Ресурснай кииннэри” тэрийиэҕиҥ диэн этиилэр киирэн, боротокуолга сурулуннулар.

Форум мунньахтарынан эрэ муҥурдаммата, сарсыҥҥы күнүгэр семинар-тренинг ыытыллынна. Манна ХИФУ преподавателэ, научнай программалары уонна граннары өйүүр киин дириэктэрэ В.И.Дмитриева бырайыактары суруйууга үөрэттэ, сокуоннары сырдатта. Үөрэтии босхо буолан, биһиги дьоммут элбэҕи туһаннылар, онно эбии үөрэммиттэрин туоһулуур анал сертификат туттулар.

Форум кыттыылаахтара Чурапчы улууһун дьаһалтатыгар, департамеҥҥа, Одьулуун нэһилиэгин дьаһалтатыгар, Аграрнай техникум салалтатыгар, коллективыгар, олохтоохторго таһымнаах тэрээһиннэрин иһин махталларын биллэрдилэр.