Илин эҥэргэ, Томпону киллэрэн туран, уопсайа аҕыс анал орто үөрэх кыһата баар: 2011 сыллаахха аһыллыбыт тимир суол үлэһиттэрин бэлэмниир Аллараа Бэстээхтээҕи транспорт техникума, 2006 сылтан урукку Чурапчытааҕы "Сельхозтехника" холбоһук базатыгар тэриллибит политехническай колледж, 1967 сылтан үлэлээбит Одьулууннааҕы ОПТУ (кэлин лицей) оннугар 2014 сылтан саҥалыы тэриллибит агротехникум, Хаандыгатааҕы хайа-геологическай техникум уонна өрдөөҕүттэн үлэлиир баай уопуттаах, элбэх ыччаты араас идэҕэ уһуйбут Амма Алтанын, Таатта Харбалааҕын, Мэҥэ-Хаҥалас Төҥүлүтүн, Уус-Алдан Суоттутун лицейдэрэ.

Бу обществоҕа олус туһалаах оробуочай каадырдары бэлэмниир үөрэх кыһалара, түөлбэлээн олороллорунан даҕаны сөп түбэсиһэн, бэйэ-бэйэлэрин кытта элбэхтик алтыһан, хардарыта сылдьыһан, уопут атастаһан, араас эйгэҕэ күрэстэһэн бииргэ үлэлииллэр.

Холобур, ааспыт ыйга аграрнай техникум базатыгар ити ааттаммыт анал үөрэх кыһаларын уонна илин эҥэр улуустар ОДьКХ-н бастыҥ сыбаарсыктарын икки ардыларыгар хамаанданан уонна биирдиилээн бастыыр иһин олус хатыһыылаах уонна туһалаах күрэхтэһиилэрэ буолан ааспыта. Онно хамаанданан Чурапчы колледжын сыбаарсыктара кыайыыны ситиспиттэрэ, иккискэ - "Хатан" ХЭТ (Чурапчы), үһүскэ - Амма ОДьКХ-та тиксибиттэрэ. Оттон биирдиилээн куоталаһыыгабастакы миэстэни Евгений Христофоров (Чурапчы колледжын үһүс куурсун устудьуона), иккиһиНиколай Винокуров ("Хатан" ХЭТ), үсүһүЕгор Грязнухин (Таатта ОДьКХ) ылбыттара.

Оттон бу соторутааҕыта ити анал үөрэх кыһаларын Улуу Кыайыы 70 сылыгар анаммыт уус-уран самодеятельностарын көрүү Одьулууннааҕы агротехникум базатыгар буолан ааста. Куоталаһыыга барыта 200-тэн тахса киһи, ол иһигэр үөрэх кыһаларын учууталлара, тех-үлэһиттэрэ көхтөөхтүк кытыннылар. Коллективтар бары даҕаны кыһаллан бэлэмнэнэн сэрии тиэмэтин, Кыайыы суолтатын балачча киэҥник арыйдылар, киһи сэргиир, кэрэхсиир толоруулара аҕыйаҕа суохтар.

Түмүккэ бастакы миэстэни Аллараа Бэстээхтээҕи транспорт техникума, иккиһи Суоттутааҕы, үсүһү Төҥүлүтээҕи лицейдэр ыллылар.

Ити курдук илин эҥэр анал үөрэҕин кыһалара бииргэ тутуспутунан үлэни, үөрэҕи, сынньалаҥы дьүөрэлээн үлэлииллэр-хамсыыллар.