Хамаанданан күрэхтэһиигэ Чүүйэ хамаандата (А.Г.Игнатьев, Арина Федорова, Максим Федоров) бастакы, Тиэлиги (В.В.Борисов, Мира Иванова, Лаврик Степанов) иккис, Ороссолуода (В.И.Аммосов, Сайыына Дмитриева, Арчылаан Апросимов) үһүс миэстэлэри ыланнар, остуол тенниһин федерациятын мэтээлинэн, грамотатынан уонна спорт управлениета туруорбут сэмэй бэлэхтэринэн бэлиэтэннилэр.

Биирдиилээн бастыыр иһин киирсиигэ улуус күүстээх спортсменнарын Е.М.Куприяновы, А.Г.Игнатьевы, Е.В.Егоровы, Е.Т.Скрябини, Т.П.Дьяконовы, В.И.Аммосовы, Н.Ф.Киренскэйи, Д.Н.Петровы, В.В.Борисовы, Е.М.Калачевы, И.И.Катакиновы уо.д.а. кэннилэригэр хаалларан Сережа Герасимов (Чүүйэ), Прокопий Федоров (Майа), Саша Антонов (Ороссолуода) инники күөҥҥэ тахсаннар остуол тенниһэ улууспутугар күүскэ сайдан эрэрин туоһулаатылар. Эдэр кэскиллээх оонньооччубут Сережа Герасимов В.П.Винокуров туруорбут 15 тыһыынчалаах, Прокопий Федоров Винокуровтар күтүөттэрэ Н.Г.Цыпандин туруорбут 10 тыһыынчалаах, Саша Антонов Винокуровтар уоллара Павел 5 тыһыынчалаах харчынан бириистэрин ыллылар.

Сахабыт сирин 10 күүстээх оонньооччуларын күрэс былдьаһыылара олус тыҥааһыннаахтык ааста. Сахалартан бастакы маастарбыт Дальнай Восток регионугар икки сыл субуруччу биирдиилээн уонна хамаанданан түмүккэ кыайыылааҕынан буолбут Уус-Алдан Найахытын уола Василий Румянцев бастакы, Анатолий Ефремов иккис, Ньургун Сабарайкин үһүс миэстэҕэ тахсаннар, туһааннааҕынан "Кыталык" ансаамбыл туруорбут 35 тыһыынча солкуобай, улуус Мунньаҕын бэрэссэдээтэлэ, улуус баһылыга уонна кини солбуйааччылара кыттыһан туруорбут 20 тыһыынча солкуобай, Василий Винокуров үөрэнээччитэ предприниматель Р.П.Егорова 15 тыһыынча солкуобай харчынан бириистэрин ыллылар.

Бириистээх миэстэҕэ киирбэтэхтэртэн интэриэһинэй оонньууну көрдөрөннөр Сергей Леонтьев (Хаҥалас), Михаил Эртюков (Таатта), Константин Владимиров (Ороссолуода) Майа сэлиэнньэтин баһылыга туруорбут бириистэринэн биһирэнэн, дойдуларыгар өттүк харалаах бардылар.

Спорт бу көрүҥэр сүгүрүйээччилэргэ анаан Наум Федоров "Сирдээҕи олоҕум аргыһа" хоһоонугар Прокопий Федоров мелодия айан, күрэхтэһиини үөрүүлээхтик сабыыга ыллаан иһитиннэрдэ, күрэхтэһээччилэри улаханнык долгутта, дохсун ытыс тыаһынан доҕуһуолланна.