Мэҥэ-Хаҥаласка «Үлэ киһини киэргэтэр» кинигэ сүрэхтэниитэ буолла

Төхтүргэ нэһилиэк библиотекатын (салайааччы Анна Павлуцкая), культура дьиэтин (Валерий Степанов) үлэһиттэрин тэрийиилэринэн Саха сиригэр ХХ үйэ рекордун олохтообут ыанньыксыт, СР тыа хаһаайыстыбатыгар үтүөлээх үлэһитэ, Ленинскэй комсомол лауреата, «Үлэ Албан аата» 3-с степеннээх, «Хотугу сулус» уордьаннар кавалердара, улуус бочуоттаах гражданина Павел Петрович Шарин туһунан «Үлэ киһини киэргэтэр» кинигэ сүрэхтэниитэ буолла.

Павел Шарины тыа хаһаайыстыбатын управлениетын салайааччы Иван Аргунов, нэһилиэк баһылыга Иннокентий Яковлев, уруккута Герой Попов аатынан совхоз директора Михаил Санников, Тыа хаһаайыстыбатын министерствотын уонна кинигэ геройун кытта билигин бииргэ үлэлии сылдьар агропромышленнай комплекс консультациялыыр-методологическай киинин үлэһиттэрэ, совхозка 80-с сыллардаахха «Тайҕа» ыччат-комсомольскай фермаҕа бииргэ үлэлээбит ыанньыксыттара итиитик-истиҥник эҕэрдэлээтилэр, ис сүрэхтэн этиллэр ахтыылары оҥордулар.

Биир дойдулаахтара республика итиэннэ СР Тыатын хаһаайыстыбатын министерствотын салалталара ХХ үйэ рекордсмен-ыанньыксытыгар, быйыл сайын 60 сааһын туолар Павел Петрович Шариҥҥа «Россия Үлэҕэ Геройа» үрдүк аатын иҥэриини туруорсалларыгар бэйэлэрин санааларын эттилэр.