Бу күн театр фойета библиотека курдук оҥоһуллан, улууспут айар дьонун туһунан кэпсиир-ипсиир кинигэ быыстапкалара тэрилиннилэр. Тэрээһин «Культура илгэлээх күүһэ» театральнай туруоруунан саҕаланна. Талааннаах ыччаттарбыт, эдэр салайааччылар ийэ тыл, поэзия туһунан хоһооннорун аахтылар.
Библиотека фонугар ыалдьыттары кытта «Саргылаах санаа дьоһун түһүлгэтэ» диэн ирэ-хоро кэпсэтиини улуустааҕы киин библиотека салайааччыта Елизавета Корнилова ыытта. Улуус культураҕа уонна духуобунай сайдыыга управлениетын начальнига Сергей Холмогоров Культура сылыгар туох-ханнык үлэлэр ыытыллыбыттарын билиһиннэрдэ. Россия Суруйааччыларын союһун чилиэнэ Константин Сосин литература суолтатын, оттон Дьокуускайтан ыалдьыттыы кэлбит Мэлдьэхситтэн төрүттээх Россия Суруйааччыларын союһун эдэр чилиэнэ Александра Попова‒Долгура уус-уран литература уонна билиҥҥи кэм туһунан санааларын үллэһиннилэр. Төҥүлү нэһилиэгин баһылыга Анатолий Плотников культураҕа, библиотека сайдыытыгар болҕомтону ууруу, ааҕыы суолтатын, улуустааҕы «Таммахтар» литературнай холбоһук салайааччыта Августина Владимирова быйылгы сылга былааннарын сырдатан туран, улууспут айар дьонугар аналлаах саҥа кинигэ бэлэмнэниитигэр күүс-көмө буолалларыгар ыҥырда.
Киин библиотека коллектива «Үүнүүбүт-сайдыыбыт тирэҕэ ‒ кинигэ» диэн куонкурус түмүгүн таһаарда. 14 улахан киһи, 30 үөрэнээччи кыттыбытыттан улахан дьоҥҥо Маттаттан Марианна Ксенофонтова, үөрэнээччилэргэ Майатааҕы лицейтэн Айыллаан Максимов кыайыылаахтарынан ааттананнар сэмэй бэлэхтэринэн бэлиэтэннилэр.
Тэрээһин сүрүн чааһыгар культура сайдыытыгар үлэлэспиттэргэ оройуон баһылыгын бастакы солбуйааччы Павел Сазонов уонна улуус культураҕа уонна духуобунай сайдыыга управлениетын начальнига Сергей Холмогоров наҕараадалары туттартаатылар. СР Правителствотын Махтал суругунан Томтортон Парасковья Местникова, «СР культуратын туйгуна» бэлиэнэн улуустааҕы киин библиотекаттан Антонина Васильева, Олоҥхо дьиэтиттэн Мария Говорова, Хаптаҕайтан Александра Кларова, Лоомтукаттан Ольга Тимофеева, СР Культуратын министерствотын Махтал суругунан Томтортон Анатолий Свинобоев, Табаҕаттан Екатерина Борисова, Хаптаҕайтан Валентина Петрова, «СР норуот уус-уран айымньытын сайдыытыгар кылаатын иһин» бэлиэни Төҥүлүттэн Надежда Заровняева, Семен Катакинов, Аллараа Бэстээхтэн Ньургустаана Черкашина, оройуон баһылыгын Махтал суругунан «Олоҥхо дьиэтэ» норуот айымньытын киинин специалиһа Аксинья Маркова, оройуон Сэбиэтин Махтал суругунан улуустааҕы киин библиотекаттан Марианна Никанорова, «Улуус культуратын уонна искусствотын сайдыытыгар кылаатын иһин» бэлиэнэн Аллараа Бэстээхтэн Светлана Мельчанова, Хорообуттан Татьяна Тролукова, улуус культураҕа управлениетын Бочуотунай грамотатынан Чыамайыкыттан Анна Архипова, Төхтүртэн Светлана Маркова, Хараттан Татьяна Степанова, Махтал суругунан Ольга Дмитриева, Сардаана Катаева бэлиэтэннилэр.
Оройуон баһылыгын дьаһалынан биир дойдулаахпыт, саха народнай суруйааччыта Рафаэль Баҕатаайыскайга анаммыт стипендия туоһу суруга суруйааччы сиэнигэр Егор Тараяровка туттарылынна. Литература сылын анал бэлиэтин улуус культураҕа управлениетын начальнига Сергей Холмогоров улуустааҕы киин библиотека директорыгар Елизавета Корниловаҕа үөрүүлээх быһыыга-майгыга туттарда.
Дьоро күнү Суорун Омоллоон аатынан Опера уонна балет государственнай театрын солиһа, Россия үтүөлээх уонна народнай артыыһа Альбина Борисова‒Кычкина, эдэр композитор, СР культуратын туйгуна Ульяна Сергучева‒Күннэй, М.К.Попова аатынан Майатааҕы оҕо музыкальнай оскуолатын скрипкаһыттарын ансаамбыла о.д.а. эҕэрдэ нүөмэрдэринэн киэргэттилэр.
Комментарии
Авторизация на сайте через социальные сети