Мэҥэ-Хаҥалас «Кыталык» үҥкүү народнай ансаамбыла 35 сылын бэлиэтиир

Үгүс көлүөнэ ыччаты кэрэҕэ сирдээбит, үҥкүүгэ уһуйбут, саха норуотун үҥкүүтүн омук дойдуларыгар билиһиннэрбит РФ үтүөлээх коллектива үрдүк ааты сүгэр «Кыталык» үҥкүү народнай ансаамбыла бу күннэргэ дьонун-сэргэтин кытта 35 сылын бэлиэтиир. Ансаамбыл солбуллубат салайааччытынан Российскай Федерация, Саха Республикатын культуратын үтүөлээх үлэһитэ Василий Винокуров-Кыталык Баһылай буолар.

Үбүлүөйгэ анаммыт тэрээһиннэр киэҥ далааһыннаахтык ыытыллаллар. Ол курдук, ансаамбыл эдэр хореографтара «Кыталыктыын дайыы» куонкуруһу тэрийэн саха үҥкүүтэ салгыы сайдарыгар олук уурустулар. Манна алта улуустан, киин куораттан барыта 542 үҥкүүһүт кытынна. Оттон спортивнай уонна бальнай үҥкүү куонкуруһугар ыраахтан-чугастан 116 паара кэлэн үҥкүүлээтэ.
«Кыталыктар» Мэҥэ-Хаҥалас киинигэр Майаҕа Дмитрий Ходулов аатынан театрга икки күн толору саалаҕа бэртээхэй кэнсиэр көрдөрдүлэр.

Бүгүн, ахсынньы 17 күнүгэр, «Кыталак» ансаамбыл Дьокуускайга ыалдьыттыыр. ХИФУ «Сэргэлээх уоттара» Культура киинигэр буолар кэнсиэргэ бүгүҥҥү «кыталыктар» урут ансаамбылга сылдьыбыт эдьиийдэрин-убайдарын кытта сценаҕа бииргэ үҥкүүлүөхтэрэ. «Кыталыктардыын» 35 сыл устата алтыспыт, бииргэ үлэлэспит биллиилээх ырыаһыттар — Екатерина, Алексей Егоровтар, Александра Алексеева, Виталий Очиров, Прокопий Федоров, Анатолий Бурнашев, Сахаайа, уо.д.а. кыттыылаах сэргэх кэнсиэр буолуоҕа.
«Сүүрбэ биэстээхпэр Кемероватааҕы культура институтун бүтэрэн Майаҕа үлэлии кэлбитим. Оччолорго туспа дьиэлээх-уоттаах улахан тэрилтэ буолуохпут, ыырбыт кэҥээн омук дойдуларынан саха искусствотын билиһиннэриэхпит диэн, бука, санаабатах буолуохтаахпын. Кэмэ да атын этэ. Үлэ эрэ туһунан толкуйдуурбут. Үҥкүү алыптаах эйгэтин норуоккар тиэрдэр туһугар»,- диир Василий Павлович.