Коллективы эҕэрдэлии Дьокуускайтан СР үтүөлээх артыыската Екатерина Егорова, СР народнай артыыһа Алексей Егоров, СР Культуратын туйгуна Герман Степанов итиэннэ Иван Аргунов, Виталий Очиров, Александра Алексеева, Прокопий Федоров, Сардаана Осипова, улуус салалтата, тэрилтэлэр эҕэрдэлээтилэр, сэмэй бэлэхтэри туттардылар.

Оройуон баһылыга Николай Старостин: "Кыталык" оҕо-ыччат киинэ тэриллибитэ 35 сылын бэлиэтиибит. Бу сыллар устата тыһыынчанан ыччаттарбыт культура, үҥкүү, спорт араас хайысхатыгар үөрэнэн, эт-хаан, өй-санаа өртүнэн сайдан кэллилэр. Ансаамбылы тэрийэн, күн-бүгүҥҥэ диэри иитэ-салайа сылдьар Александра Гаврильевна уонна Василий Павлович Винокуровтар бүтүн аан дойду, Россия үрдүнэн киэҥник биллэллэр. "Кыталыгынан" биһиги республикабытын билэллэринэн киэн туттуох тустаахпыт. Ансаамбыл улууспут брендинэн буолар, онон өрүү иннибитигэр уктан улахан тэрээһиннэргэ илдьэ сылдьабыт. Эһиил Кыайыы 70 сылыгар Москва, Санкт-Петербург куораттарга улууспут дьоно-сэргэтэ биир дойдулаахтарбытыгар, олохтоохторго ыһыахтары тэрийэн ыытыахтаахпыт, ити - улахан эппиэтинэс. Итиэннэ күһүөрү Дальнай Восток үрдүнэн сыллата ыытыллар быыстапка-дьаарбаҥка культурнай программатын тэрийиэхтээхпит, онуоха Василий Павлович күүс-көмө буолуоҕа. Өссө төгүл барыгытын бэлиэ күнүнэн эҕэрдэлиибин, "Кыталык" өссө да аар-саарга аатыра, үүнэ-сайда турдун диэн баҕа санаабын этэбин", - диэн туран коллективка харчынан сертификаты туттарда.

Уус-уран салайааччы Василий Винокуров кэлбит дьоҥҥо махтанан туран: "Биһиги ансаамбылбытын алгыстаах аатынан сүрэхтээбит Алексей Леонтьевич Попову, саха тыынын укпут Иоаким Дмитриевич Избековы махтана ааттыыбыт. Кинилэр сырдык, сылаас тыыннара биһиги аттыбытыгар сылдьарын билэн тураммыт, таптыыр Майабыт олохтоохторо 35 сыл устатын тухары биһигини бүөбэйдээн, көтүтэн баччааҥа диэри аҕалбыккытыгар ис сүрэхпититтэн махталбын тиэрдиэхпин баҕарабын. Оҕолорбут, ыччаттарбыт аптаах ытыскыт тыаһынан бу олоххо дьолу-соргуну алҕаан тиэрдиэххит диэн эрэнэбин", - диэтэ.

Үөрүүлээх киэһэ ансаамбыл араас көлүөнэ үҥкүүһүттэрэ түмсэн түспүт хаартыскаларын галерея оҥорорго анаан бэлэхтээтилэр, бу күн ансаамбыл сайдыытыгар кылааттарын киллэрсибит салайааччыларга, үҥкүүһүттэргэ үгүс наҕараадалар, Василий Павловичка Россиятааҕы государственнай норуот айымньытын дьиэтин директора Тамара Пуртова уонна СР Ил Дархана Егор Борисов Махтал суруктара туттарылынна.