Биһиги улууспутуттан төрүттээх тоҕус Саха сирин Суруйааччыларын сойууһун чилиэнэ баар - народнай суруйааччы Ермолаев Рафаэль Дмитриевич-Баҕатаайыскай, Борисов Николай Федорович-Уус, Гаврильева Валентина Николаевна, Дмитриев Петр Никифорович-Туутук, Ермолаев Семен Никонович-Сиэн Өкөр, Осипов Иван Иванович-Ойуур, Чугунов Афанасий Васильевич, Марков Степан Степанович, Сосин Константин Ильич. Литература сылынан библиотека үлэтин хайысхата суруйааччылары, кинигэни сырдатыы өттүгэр күүһүрэн биэрэрэ саарбаҕа суох. Ол курдук, культура управлениетын, улуус дьаһалтатын кытта бииргэ үлэлиир былааннаахпыт. Библиотека өттүттэн былааҥҥа нэһилиэктэринэн "Творчество моих земляков" литературнай марафон, суруйааччылары кытта көрсүһүүлэр, литературнай киэһэлэри тэрийии уо.д.а. ыытыллыахтара. Библиотекаҕа кинигэни атастаһыы (фримаркет) тэриллэн ааҕааччылары тардыыга сонун хайысха буолуо диэн эрэллээхпит.

Үүнэр сылга Майаҕа библиотека төрүттэммитэ 80 сылын бэлиэтиэхпит. Культура управлениетын иһинэн 2015 сыл Библиотека сылынан биллэриллибитэ. Манна сыл сүрүн тэрээһининэн СР культуратын үтүөлээх үлэһитэ, Россия Суруйааччыларын сойууһун чилиэнэ, СР Бочуоттаах кырдьаҕаһа, Мэҥэ-Хаҥалас улууһун, Моорук нэһилиэгин, Уус-Алдан улууһун Мүрү нэһилиэгин бочуоттаах гражданина, суруйааччы И.М.Сосин аатын библиотекаҕа иҥэрии буолуоҕа. Библиотека иһинэн биһиги ытык киһибит олоҕор, айар үлэтигэр аналлаах музей-хос тэрийиэхпитин баҕарабыт. Маны таһынан сыл устата библиотека иһинэн араас көрүҥнээх ааҕааччылары тардар, үлэбитин-хамнаспытын киэҥ араҥаҕа таһаарар сыаллаах үлэ барыаҕа.

Улуу Кыайыы 70 сылыгар библиотека иһинэн "Норуот хорсун быһыыта өлбөөдүйбэт" ыйынньык 3-с чааһа, "Герой Федор Попов хорсун быһыыта" био-библиографическай ыйынньык уонна фронтовик-суруйааччылар С.О.Никифоровка, С.И.Тимофеевка анаммыт мультимедийнэй диискэлэр тахсаллара былааннанар. Улуус төрүттэммитэ 85 сылынан салалта былааныгар 2015 сылга Мэҥэ-Хаҥалас улууһун туһунан кинигэ сериялара тахсыахтаахтара бигэргэтиллэн турар. Библиотека үлэһиттэрэ бу серияҕа улуус культуратын историятын, сайдыытын туһунан кинигэ тахсыытыгар үлэни саҕалаабыппыт.

Елизавета КОРНИЛОВА, улуустааҕы киин библиотека директора.