Мэҥэ-Хаҥалас Сыымаҕар дуобакка күрэхтэһии буолла

Мэҥэ-Хаҥалас улууһун Сыымаҕар педагог, кыраайы үөрэтээччи, дуобакка ССРС спордун маастарыгар кандидат Юрий Попов төрөөбүтэ 70 сылыгар анаммыт турнир буолла. Эр дьон, эр дьон бэтэрээннэр (55-тэн аҕа саастаахтар), дьахталлар үс бөлөххө наарданан оонньоотулар. Күрэхтэһиигэ барыта 30-тан тахса дуобатчыт кытынна.


Сарсыардаттан киэһэ алта чааска диэри барбыт турнир кыайыылааҕынан спорт маастара, Мэлдьэхси Суолатыттан сылдьар Иван Семенов буолла. Иккис миэстэни Сыымахтан Виктор Иванов ылла. Төхтүртэн Афанасий Павлов үһүс буолла.
Дьахталларга Мария Шарина, Прасковья Жиркова уонна Кира Баишева бириистээх миэстэлэргэ таҕыстылар.
Бэтэрээн дуобатчыттар ортолоругар А.А.Алексеев, А.С.Назаров уонна Н.П.Романов бастыҥнарынан ааттаннылар.
Юрий Николаевич кэриэһигэр дуобакка турнир хаһыс да сылын ыытыллар. Быйылгы күрэхтэһиигэ Мэҥэ-Хаҥалас күүстээх дуобатчыттара уонна Чурапчыттан ыалдьыттар кэлэн кытыннылар. Баатара нэһилиэгин дьаһалтата уонна Юрий Николаевич чугас аймахтара кыайыылаахтарга сыаналаах бириис туруоран, мэтээл, грамота бэлэмнээн күрэс тыынын үрдэтэн биэрдилэр.