Турнир аһыллыытыгар СӨ Конституционнай суутун бэрэссэдээтэлэ Александр Ким-Кимэн, Ил Түмэн дьокутааттара, вице-спикер Анатолий Добрянцев, «Модун» спорт национальнай көрүҥнэригэр киинин дириэктэрэ Иннокений Григорьев, улуус дьаһалтатын баһылыгын социальнай боппуруоска солбуйааччы Ирина Соколович, спорт кэмитиэтин бэрэссэдээтэлэ Юрий Никифоров кыттыыны ыллылар.

Күрэхтэһии Орджоникидзе уулуссатыгар ыытылынна. Халлааммыт сөбүгэр тыаллаах, кыралаан ибирдээн ылар ардахтаах күн буолла.

Хаҥалас улууһун баһылыгынан олорон олохтообут, улууспутугар сахалыы атах оонньууларын сайыннарар сыаллаах тэрийбит күрэхтэһиитин туһунан РФ уонна СӨ спордун маастара Анатолий Добрянцев маннык кэпсээтэ:

- 2003 сыллаахтан тэрийэн ыытабыт. 2005 сыллаахтан өрөспүүбүлүкэ таһымнаах буолбута. Бу турниртан ылсан дьарыктанан улууспутугар хас да киһи спорт маастарын нуорматын толорбута. Ол курдук, Игнат Прохоров оҕолорго Саха сирин түһүлгэлэригэр миэстэлэһэр этэ, маастар нуорматын бастакынан толорбута. Кэлиҥҥи сылларга Егор Филиппов уһулуччу ойон таҕыста. Кини билигин өрөспүүбүлүкэ күүстээх спортсменнарыттан биирдэстэрэ. Икки сыллааҕыта кылыыга олус үчүгэй көрдөрүүнү ситиһэн турар - 48 м 48 см түспүтэ. Билиҥҥи ыччаттартан спорт маастара Еремей Ильин Саха сиригэр чэпчэки атлетикаҕа да, атах оонньууларыгар инники күөҥҥэ сылдьар.

Улууспутугар талааннаах оҕолор элбэхтэр, манежпыт, үчүгэй стадиоммут суоҕа мэһэйдиир. Ол да буоллар спортка бэриниилээх Иван Гермогенов эрчийэр-дьарыктыыр оҕолоро өрөспүүбүлүкэ таһымнаах күрэхтэһиилэргэ хамаанданан да, биирдиилээн да миэстэлэһэллэр. Онон Хаҥалас улууһун атах оонньооччулара бу турниртан саҕалаан ылбыт тэтимнэрин ыһыктыбаттар.

Сахалыы атах оонньууларыгар өрөспүүбүлүкэтээҕи турнир кыайыылаахтара

 Кыргыттар

Дьахталлар

Уолаттар

Эр дьон