Ил Түмэн пресс-сулууспата иһитиннэрбитинэн, абсолюнай чемпионунан (кылыы, ыстаҥа, куобах) 121,82 м түмүктээх Иван Пестряков (ХИФУ) буолла. Георгий Жирков (Модун) иккис, турнир былырыыҥы кыайыылааҕа Мичил Яковлев (Чурапчы) үһүс бириистээх миэстэҕэ тигистилэр.

Ыччат категориятыгар  Александр Говоров  (ХИФУ) бастаата, оттон  Андрей Васильев (ХИФУ) иккис,  Владислав Попов үһүс миэстэлэри ыллылар.

Юниордарга абсолютнай кыайыылаах аатын Кай Адамов (Модун) ылла. Киниттэн кыратык хаалан  Александр Алексеев (Чурапчы) иккис,  Станислав Фёдоров (Чурапчы) үһүс миэстэ буоллулар.

Дьахталларга кылыыга уонна ыстаҥаҕа абсолютнай кыайыыны спорт маастара Альбина Моякунова (Модун) ситистэ. Иккис миэстэни  Диана Никифорова (Чурапчы), үсүһү  Валентина Иванова ыллылар. Ыстаҥаҕа Женя Гоголева (Уус-Алдан) иккис,  Диана Никифорова (Чурапчы) үһүс буолары ситистилэр.

Куобахха Валентина Иванова тэҥнээҕин булбата, Женя Гоголева иккис, Сардаана Борисова (Чурапчы) үһүс миэстэлэри ыллылар.

«Сахаада-спорт» ассоциация президенэ, Конституционнай суут бэрэссэдээтэлэ Александр Ким-Кимэн турнир эдэр кыттааччыларыгар хурустаал кубогы туттарда. Турнирга норуот депутата  Александр Сусоев, Анатолий Добрянцев тренерэ, спорт бэтэрээнэ, САССР үтүөлээх тренерэ Гаврил Сивцев, республика хас да төгүллээх чемпиона  Василий Николаев (Бүлүү), республика хас да төгүллээх чемпиона Иван Горохов  (Үөһээ Дьааҥы), уо.д.а кытыннылар.