Уруккуттан илиилэрин билсибит бөҕөстөр алта мүнүүтэ устата мадьыктыһыыларыгар хайалара да дьиэк биэрбэтэ. Юрий Старостин нөрүөн нөргүйсээччитин охторор хас да түгэни куоттарда. Онтон атын күрэс үс төгүллээх муҥутуур кыайыылааҕынан буолара хаалла. Увар даҕаны утарылаһааччытын бүдүрүтэр кыах кылам гыммытын баттаһан туһаммата. «Хапсаҕай — халбас харата» диэн маны этэн эрдэхтэрэ. Судьуйалар сэрэтиинэн кыайыыны Увар Тимофеевка биэрдилэр.

Киниэхэ Илья Кондратьев дьиэ кэргэнин аатыттан улахан телевизор уонна турнир үгэс буолбут бирииһэ - бэдэр тириитэ туттарылынна.

Суруналыыстар ыйытыыларыгар хоруйдууругар Увар: «Бу бастакыбын маннык улахан түһүлгэҕэ бастаатым. Онон олуһун диэн үөрдүм. Хапсаҕай аата хапсаҕай. Ол курдук, ыйааһыммар Николай Николаевка хотторбутум. Эдэр кэскиллээх бөҕөс. Күрэхтэһиилэри көтүппэккэ кыттар, онон кэлин сүрдээҕин эбиллибит. Мин эмиэ инникитин сыыһаларбын-халтыларбын хатылаабат буола сатыам. Оттон Юрий Старостинныын уруккуттан доҕордоһобут - бииргэ эрчиллэбит, күрэхтэһии аайы кэриэтэ күөн көрсөбүт. Бүгүҥҥү кыайыыбын чугас дьоммор, доҕотторбор аныыбын», - диэтэ.