Сыымах кулуубугар бу күн кыралыын-улаханныын 126 киһи муһунна. Баатараттан сэриигэ 154 киһи ыҥырыллыбыт, 74-дэ сэрии толоонугар охтубут, 83 киһи эргиллибитэ эрээри, үксүлэрэ сэриигэ ылбыт бааһырыыларыттан кылгас үйэлэммиттэрэ диэн баһылык Федор Захаров иһитиннэрдэ. Олохтоохтору, үөрэнээччилэри Андрей Находкин, Маргарита Максимова уонна нэһилиэк бочуоттаах олохтооҕо, педагогическай үлэ ветерана Ирина Жиркова эҕэрдэлээтилэр. Тэрээһини Ф.К.Попов аатынан Баатара орто оскуолатын кадеттар кылаастарын үөрэнээччилэрэ киэргэттилэр, дьиҥ-чахчы байыаннай тыыннаан биэрдилэр.

Бэдьимэ нэһилиэгэр Знамяны көрсүү Аҕа дойду Улуу сэриитин кыттыылаахтарын монуменыгар венок ууруутунан саҕаланна. Кулуупка мустубут дьону нэһилиэк баһылыга Федор Баишев, Мэлдьэхси нэһилиэгин баһылыгын солбуйааччы Евгений Петров, Бэдьимэ ветераннарын сэбиэтин бэрэссэдээтэлэ Василий Слепцов, Бэдьимэ оскуолатын директора Александр Винокуров историческай суолталаах тэрээһининэн эҕэрдэлээтилэр. Нэһилиэктэн 94 киһи фроҥҥа барбытыттан, 51-рэ дойдуларыгар төннүбэтэҕин туһунан нэһилиэк историятын түмээччи Тамара Сергучева кэпсээтэ. Иннокентий Винокуров, Матрена Сыромятникова сэрии сылларынааҕы ырыалары ыллаатылар.

Хорообукка Кыайыы Знамятын көрсө 157 киһи муһунна. Оскуола оҕолоро монумеҥҥа венок ууран баран, Знамяны күөрэччи туппутунан кулуупка диэри күргүөмүнэн хаамсан кэллилэр. Хорообут нэһилиэгин ытык кырдьаҕаһа, тыыл, үлэ ветерана Егор Птицын холбоһуктаах совхоз нэһилиэктэриттэн 367 тахса киһи, ону сэргэ 2 дьахтар сэриигэ барбыттарыттан, элбэх киһи эргиллибэтэҕин эттэ. Мустубут дьону нэһилиэк баһылыга Валерий Колосов, ыччаты кытта үлэҕэ специалист Александр Скрябин эҕэрдэлээтилэр. Наталья Борисова бэйэтин хоһоонун аахта, Сергей Громов, квинтет, квартет ырыа бэлэхтээтилэр, итиэннэ бука бары хорунан «Эйэ, дьол иһин» ырыаны ыллаатылар.

Бөкө оскуолатыгар 121 киһи мустан, Кыайыы Замятын күргүөмнээх «Ураа!» хаһыыынан көрүстэ. Догдоҥо нэһилиэгиттэн сэриигэ 124 киһи ыҥырыллыбыт, олортон 68-һа эргиллибэтэх. Үөрүүлээх күнүнэн баһылык Иван Новгородов, улуус бочуоттаах гражданина Спартак Титов, кырдьаҕастар «Арчы» түмсүүлэрин бэрэссэдээтэлэ Диана Степанова эҕэрдэлээтилэр. Тэрээһини оскуола оҕолоро үҥкүүлэринэн, Олег Избеков ырыатынан киэргэттилэр.

Умнуллубат түгэни өйдүү-саныы сылдьаары үөрэнээччилэр Кыайыы Знамятын күөнүгэр хаартыскаҕа түстүлэр.